Dál lea ollen Thaieatnamii
Dál lea Miss Norway, Susanne Naess Guttorm, ollen Thaieatnamii gos Miss Universe gilvvut leat álgán. Sus leat 94 gilvaleaddji miehtá máilmmi.
Mánnodaga juovlamánu 17. beaivvi mearriduvvo vuoiti Miss Universe gilvvus mas sámi nieida ovddasta Norgga.
– Mu mielas lea dát hirbmat somá, dá han lea áibbas ođđa vásáhus munnje. Dán rádjái lea leamaš somá deaivvadit eará oasseváldiiguin, ja sii orrot leamen hui šiega, muitala Susanne Naess Guttorm Thaieatnamis.
FOX nammasaš Tv-kanála sádde loahppagilvvuid njuolggosáddagis juovlamánu 17. beaivvi diibmu ovttas, ihkku. Ovddit jagiid leat badjel 650 miljovnna geahčči geahččan Miss Universe loahppagilvvu njuolggosáddaga.
– Jurddašan ahte lea somá go mun oidnon TV:S nie ollu gehččiide. In leat gal balus, muhto illudan ja lea hui gelddolaš, dadjá Naess Guttorm.
Vuosttaš gálla
Go Susanne Naess Guttorm ollii Thaieatnamii, de leat sisačáliheamit ja govvideamit čađahuvvon. Susanne lea maid válljen čuvllaid ja vuojadanbiktasiid mat galget geavahuvvot gilvvuin.
Mánnodaga lei vuosttaš geardde go Miss Universe oasseváldit deaivvadedje duopmáriiguin. Dalle lei vuosttaš gállaeahket ja oasseváldit galge coggat biktasiid mat ovddastit riikkaid gos sii leat eret.
– Mun válljejin coggat rukses čuvlla, dasa lassin geavahin sámi bealječiŋaid. Juovlamánu 11. beaivvi lea dat eahket go galgat coggat našunálabiktasa ja dalle cokkan mun gávtti, muitala Naess Guttorm.
Anne Berit Anti, dahje Abanti, lea ge gorron gávtti man Susanne coggá gilvvuide. Dasa lassin lea Signe Susanne Nedrejord skeŋken liinni man Naess Guttorm áigu coggat.
– Ii leat gal áibbas árbevirolaš gákti, muhto dat lea alit. Gáktái cokkan árbevirolaš gárvvuid, nu go liinni, soljuid, bievssuid ja boahkána, muitala Naess Guttorm.
Ollu doaimmat
Dan botta go gilvvut bistet, de leat Susannes beaivvit oalle dievva. Son muitala ahte sis leat guokte beaivvi ovdal loahppagilvvuid go besset bargat dan maid ieža háliidit. Muđui lea prográmma man čuvvot. Dál son illuda dassái go irgi ja bearaš maid bohtet.
– Dál lean vuos akto dáppe Bangkokas, muhto moadde beaivvi ovdal loahppagilvvu boahtá mu irgi ja mu bearaš maid deike. Jus in vuoitte gilvvuid, de mii áigut fárrolaga luomostallat muhtin sullos dáppe Thaieatnamis, muitala son.
Vuoitit lea ge Susanne mihttu. Buot 95 oasseváldi leat mielde loahppagilvvuin ja dán rádjái lea Filippiinnaid oasseváldi oiddot interneahta speallansiidduin. Jus son vuoitá, de ii leat oddsa go 7,5, ja jus Susanne vuoitá, de lea 100.
– Mus gal lea hui hállu vuoitit ja lean maid dán rádjái bargan nu bures go fal sáhtán. Lea oainnat dat bargu man bargá ovdal loahppagilvvu mii čájeha beasan go mun vuitiid searvái, dadjá son ja čilge:
– Leat ságastallamat mat galget čađahuvvot ja mii galgat deaivvadit duopmáriiguin ja sii jerret gažaldagaid.
Golmma geardde lávdde alde
Ii leat doarvái ahte Susanne galgá lávdde ala loahppavuorus. Ovdal dan galgá son guovtte geardde vel finadit lávdde alde duopmáriid ovddabealde.
– Dat 15 buoremusa mearriduvvojit ovdagihtii, muhto mii dieđus eat beasa ieža diehtit geat leat válljejuvvon. Leat deaivvadeamit duopmáriiguin mat mearridit man bajás mii beassat. Lea dakkár ovdagihtii válljen, muitala son.
Dassážii go Ávvir humada suinna, de lea son leamaš measta dušše hoteallas. Susanne dadjá ahte Bangkokas lea hirbmat báhkka. Ovdalaš go Ávvir čuojahii sutnje, de lei leamaš 34 lieggaceahki.
– Dán vahkku mielde mii galgat vuolgit sáttogáddái govvet. Dat gal šaddá hui somá, beassat oaidnit eará báikkiid Thaieatnamis, dadjá Susanne.
Son muitala iežas finadan ruovttus Kárášjogas vahkku ovdal go vulggii Thaieatnamii, nu ahte sutnje lea stuora dálkkádaterohus ollet lullieatnamiidda.
– Mun finadin viežžame gávtti ja lohkame «báze dearvan» iežan bearrašii ja olbmáide Kárášjogas. Sáhttá oainnat gollat guhkes áigi ovdal go fas beasan fitnat ruovttus, dadjá Susanne.
Golgat jagi
Lea oainnat nu ahte son gii vuoitá Miss Universe gilvvu galgá johtit miehtá máilmmi Miss Universe bargguin. Lea dušše okta norgalaš gii lea vuoitán Miss Universe ovdal. Mona Grudt vuittii gilvvu 1990:s. Dat gii vuoitá gilvvu, dat váldá badjel Miss Universe namahusa Lulliafrihká Demi-leigh Nel-petersis.
– Jus vuoittán Miss Universe gilvvu, de vuolggán New Yorkii beaivvi maŋŋel loahppagilvvu. Dalle álgá Miss Universe bargu. Dat livččii hirbmat somás vásáhus. Muhto jus in vuoite, de gal beasan vuolgit lupmui dáppe Thaieatnamis bearrašiin ja irggiin ja de gal boađán fas Norgii juovlamánu 31. beaivvi, dadjá Susanne Naess Guttorm.
Dán gilvvus lea maid álbmotfávorihttajienasteapmi nu go Miss Norway gilvvus ge lei.
– Jienasteapmi ii leat vuos rahppon ja mun in dieđe goas rahppo. Jienasteapmi lea Miss Universe ruovttusiiddus, ja lea nuvttá jienastit, loahpaha Susanne Naess Guttorm.