Jienas dán jagi sápmelačča
Diimmá rájes lea Jovsset Ante Sara guoddán namahusa «dán jagáš sápmelaš». Dál galgat nammadit ođđa, ja don beasat leat mielde mearrideame gii dán jagi sápmelažžan šaddá.
Nu go diibmá, de galgá dán jagáš sápmelaš fas nammaduvvot. Dál besset lohkkit jienastišgoahtit gii jagi 2018 sápmelažžan galgá šaddat.
Sápmelaš galgá bargan buori barggu sámeservodaga hárrái, ja soaitá beaggán medias iežas barggu dahje rahčamuša oktavuođas. Duvle hástaleimmet lohkkiid evttohit geat sin mielas ánssášit guoddit namahusa «dán jagáš sápmelaš».
Dál leat hábmen ollislaš listtu, ja hástalit fas lohkkiid jienastit su guđe sii oaivvildit ánssášit dán namahusa.
Jienastit telefovnna bokte
Ođas dán jagi lea ahte jienasteapmi čađahuvvo SMS bokte.
– Go bivdit álbmoga jienastit telefuvnna bokte, de dat diehttelasat sáhttá mielddisbuktit ahte eai boađe nu olu jienat go daid ovddit jagiid, muhto boađus šaddá eambbo luohtehahtti go olbmot eai sáhte eará go oktii jienastit guđiinge telefonnummariin, čilge Ávvira neahttadoaimmaheaddji Berit Marie Lise Eira.
Sara jagi 2017 sápmelaš
Diibmá vuittii guovdageaidnulaš Jovsset Ánte Sara bálkkašumi. Sara bekkii 2017:s go lea vuosttaš ja áidna badjeolmmoš gii lea stevdnen stáhta unnidangáibádusa dihtii Finnmárkkus. Vássán jagis lei su ášši sihke lágamánnerievttis ja Alimusrievttis, gos loahpalaččat stáhta vuittii.
Evttohasat: 1. Ella Marie Haetta Isaksen
Ella Marie Haetta Isaksen vuittii Sámi Grand Prix 2016 lávlagiin «Luoddaearru», dan rájes lea dušše mannan ovtta guvlui dán nuorra artisttas.
– Son lea riikamedias čalmmustahttán sihke sámi kultuvrra ja giela. NRK Stjernekamp oktavuođas lea maid Norga beassan gullat man fiinnis luohti lea, čállá okta guhte evttohii su.
2. Joachim Olsen
Nuorra kárášjohkalaš birge bures čáhcecrossas. Son lea olahan buriid bohtosiid mannan geasi, ja beassan gitta Amerihkkái gilvvohallat.
3. Erlend Elias Bragstad
Erlend Elias lea leamaš mielde olu Tv-prográmmain, sihke «Kjendis-farmenis», «71 grader nord» ja «Skal vi danse». Son lea čalmmustahttán ja ain čalmmustahttá sápmelaččaid viiddis Norggas.
– Son lea hui iešlágan, duostil, čájeha sámevuođa ja maiddái rabas iežas homofiliijain ja lea maid dakko bokte hui buorre ovdagovva sihke eará homofiillaide ja sápmelaččaide geat leat gullan dahje fuobmán iežaset sámi duogáža, čállá son gii evttohii su.
4. Susanne Naess Guttorm
Sámi nieida nammaduvvui «Miss Norway». Susanne šattai sihke «Miss Norway» ja álbmotfavorihtta.
Dan maŋŋil lea maid son ovddastan Borasdávdasearvvi ja čalmmustahttán čižžeborasdávdda. Dál lea son Bangkokas gos gilvala šaddat «Miss Universe».
5. Aslak Anders Gaino
Guovdageaidnulaš lea Sámi Gamers jođiheaddji ja lágida muđui feara makkár doaimmaid Guovdageainnu nuoraide.
– Son ánssáša guoddit dan namahusa dan barggu dihte maid son bargá nuoraide Guovdageainnus ja muđui Sámis Sámi Gamers bokte, čállá son gii su evttohii.
6. Anders Nils Peder Sokki
Sokki oaččui 1998:s siidaoasi iežas eagis. Son ii beassan váldit dan atnui, ja 2007:s son váiddii dan ášši, man Boazodoallostivra hilggui.
Guovdageaidnulaš lea lágastan stáda vuostá Alimusrievttis ja maiddái guoddalan ášši lágamánneriektái, gos čuoččuha dan maid čađat lea čuoččuhan, ahte ii son leat bivdán ođđa siidaoasi, muhto rahpat fas iežas eagi siidaoasi man son lea ožžon.
7. Synnøve Persen
2018 lea leamaš dáiddára Synnøve Persena jahki. Čakčamánus geigejuvvui sutnje kulturráđi 600 000 ruvdnosaš gudnebálkkášupmi su máŋggajagáš dáiddalaš doaimmain. Seamma vahkku go almmuhuvvui ahte Synnøve Persen lea ožžon kulturráđi gudnebálkkášumi, de beakkehii vel ahte son lea nammaduvvon Bassi Olava ortnega kommandevran.
8. Erika Unnes
Son lea Staare 2018 ávvudemiid prošeaktajođiheaddji ja nu lea jođihan daid stuorra ávvudoaluid mat leat muitun dasa go leat vássán 100 jagi dan rájes go Ruoŧabeale sápmelaččat vuosttaš geardde čoahkkanedje. Dan oktavuođas lágidii son maid Sápmi Pride doaluid Staares mat lihkostuvve bures. Daid doaluid ovddas oaččui son RFSL Östersund, Jämtland Härjedalen bálkkašumi.
9. Beaska Niillas
Ellos Deatnu akšuvnna Norgga beale láidesteaddji; joavku mii vuostálastá Norgga ja Suoma stáhtaid Deanočáhcádaga soahpamuša. Son lea maid jođihan Norgga Sámiid Riikasearvvi, muhto lea dál válljen luohpat.
– Son bargá garrasit sámi servodaga ovddas rivttiid hárrái, ja beaggá álo medias, čállá son gii evttohii su.
10. Runar Myrnes Balto ja Mikkel Eskil Mikkelsen
Mikkel Eskil Mikkelsen ja Runar Myrnes Balto leaba vuosttaš rabas homofiila sámediggeáirasat. Dan dihtii vuittiiga maid «Dán jagáš Lhbt-olmmoš» bálkkašumi GayGallas dán jagi.
11. Erik Anders Saeter
Son lea dán jagi beaggán hui olu. Sihke dan dihte go lei mielde «Paradise Hotel» ja «Kjendis-farmen» nammasaš reality tv-ráidduin, muhto maiddái go lea beaggán miehtá riikka. Son lea rahpasit muitalan iežas sámi duogáža birra ja nu maid čájehan sámi máŋggabealatvuođa.
12. Agnete Lorås (96)
Agnete Lorås bajásšattai mearrasámi gilážis, Jáhkovuonas. Nuorran gárttai fárret máttás, gos áiggi mielde hilggui iežas sámi duogáža go vásihii menddo lossadin leat sápmelažžan. Čakčat muitalii NRK Sámis mo son vásihii dáruiduhttima, ja šattai nu dáruiduhttima ámadadju.
13. John Anders Sara ja Karen J. Utsi Sara
Skuohtanjárgga badjeolmmoš, John Anders Sara ovttas eamidiin, Karen J. Utsi Sarain, álggaheigga iežaska bohccobiergofitnodaga, Skodi Rein, mii lea šaddan sukseassan.
Vássán jagi leaba ge beaggán sakka. Soai vuittiiga Norggameasttirgilvvus golli, goikaduvvon njuokčamiin, ja nuppi saji Árktalaš árvoháhkanbiebmogilvvus, goikaduvvon njuokčamiin.
14. Ivan Aleksander Buljo
Guovdageainnu bárdni lea dan maŋemus jagi beaggigoahtán iežas musihkain. Son ii leat lávllo iige juoigga ieš, muhto bidjá musihka luohtái ja lea bures lihkostuvvan Spotifyas.
Su musihkat Sterk-anders, Biret ja Lásse ja Máret Inger maid Spotifys lea almmuhan, leat guldaluvvon badjel 15 000 geardde.
15. Ina-theres Sparrok
Boazosápmelaš Ina-theres Sparrok šattai dán jagáš nuorra boazosápmelažžan, geasa eanandoalloja biebmoministtar Jon Georg Dale geigii dan bálkkašumi.
– Iežas barggu čađa ja beroštumiin boazoealáhussii lea Sparrok leamašan mielde huksemin beaggima ealáhusas, dajai Ellinor Marita Jåma dan birra.
16. Aslat Holmberg
Suoma beale Ellos Deatnu akšuvnna láidesteaddji. Son lea garrasit čuoččuhan sámi rivttiid.
Holmberg čálii masterčállosa guolástanrivttiid birra Deanučázádagas. Dan ovddas vuittii vuosttaš Árdna bálkkašumi.
17. Sara Ajnnak
Artista ja boazosápmelaš lea vuosttaldan Násavári ruvkedoaimmaid. Son lea leamašan njunnožis ásahit moratoria Násavárrái.
Jienasteapmi loahpahuvvo juovlamánu 31. beaivvi diibmu 23.59. Ođđajagemánu 3. beaivvi almmuha Ávvir bohtosiid.