Ožžo stipeandda iežaset masterbargguide
Golbma sámi journalistihka masterstudeantta ožžo stipeandda Sámi Journalisttaid Searvvis (SJS). Stipeandda ulbmil lea doarjut sámi journalisttaid ja journalistastudeanttaid.
SJS foanddastivra juohká juohke jagi doarjaga sámi journalisttaide ja/dahje journalistastudeanttaide. Doarjja lea oktiibuot 30 000 ruvnno.
Journalistihka másterstudeanttat
Dán jagáš stipeanda juhkkojuvvui golmma studentii: Johan Ante Utsi, su masterbargui: «Mat leat dat earánoamášvuođat sámi muitalusain, luohtedajahusain ja sámi gulahallandovdomearkkain? Ja movt dáid earánoamášvuođaid sáhttá ávkkástallat ja heivehit sámi journalistihkkii?».
Nubbi gii oaččui stipeandda lea Inga Marja Steinfjell, masterbargui: «Lullisámi almmolaš ságastallan – gos gávdno dat ja movt dat doaimmašii buoremusat?». Goalmmát lea Nils Johan Eira gii čállá: «What is the mechanism behind hate comments on Facebook when Saami news cases are publiched».
Sii leat buot golmmas čađaheame masterbargguid journalistih kas álgoálbmotperspektiivvas, Sámi allaskuvllas.
Miellagiddevaš dutkanfáttát
Lea SJS foanddastivra mii meannuda ohcamiid ja sin mielas leat buot golbma dutkanfáttá miellagiddevaččat ja háliidit doarjut daid duohtandahkama.
Lassin lohká foanddastivra ahte dát golmmas leat guhká bargan journalistan Sámis ja go dál leat viidásit dutkame journalistihka, de leat sin mielas dat hui dehálaš sámi servvodahkii.
Addá movtta dutkamii
Johan Ante Utsi, gii oaččui oasi dán jagáš stipeanddas, lohká ahte stipeanda movttiidahttá ja dál beassá šukkoláde návddašit gáfestallamis buriin oamedovdduin. Utsi lohká maid ahte SJS lea máilmmi mávssolaš searvi, mii ii dušše juollut stipeanddaid.
– Lea diehttelasat earenoamáš buorre go dorjot masterstudeanttaid, muhto mu mielas lea buorre go doarju buohkaid geat čállindáidagiin ovddidit sámi servodatáššiid, lohká Utsi.
Sávvá ahte stipeandda ohcet ja ožžot eambbogat
SJS jođiheaddji, Nils Johan Heatta lohká ahte dát stipeanda ortnet lea dehálaš movttiidahttin dihte sámi journalisttaid ja earenoamá žit sámegieljournalisttalaš bargguid.
– Stipeanda galgá doarjut sihke buvttadeami ja nu go dán oktavuođas oahpahallama. Dat han lea mielde nanneme sáme- ja sámegieljournalistihka earenoamážit, lohká Heatta.
Heatta sávvá ahte šattašii ain bivnnuheabbo ja dehálaš ohcat ja oažžut dákkár stipeandda.
– Lea buorre go dat geat ovddidit sáme- ja sámegieljournalistihka lihkostuvvet oažžut dákkár stipeanddaid, ja šávašin ahte áin eambbogat ohcet boahttevaš jagiid, loahpaha vel Heatta.