HIRBMAT BEROŠTUPMI duodjekurssaide
Gaska-finnmárkku Duodjeinstituhtta Kárášjogas lea maŋemus áiggiid doallan iešguđetlágan duodjegoarrunkurssaid Kárášjoga olbmuide. Kurssat orrot bivnnuhat, go kursasajit dievihit jođánit.
Čavčča rájes leat Kárášjoga gili olbmot beassan oahppat duddjot ja goarrut. Gaska-finnmárkku duodjeinstituhtta lea lágidan iešguđelágan kurssaid sihke mánáide ja rávisolbmuide.
Bivnnuhis kurssat
Gaska-finnmárkku Duodjeinstituhta beaivválaš jođiheaddji, Heidi Alette Gaup, muitala ahte kursa lea leamašan bivnnut gili olbmuid gaskkas. Sihke mánáid ja rávisolbmuid kurssat dievihit jođánit, seamma beaivvi go kurssat almmuhuvvojit.
Iešguđelágan duojit
Dán rádjái leat leamašan kurssat mas ohppet márfut, gáhpiriid goarrut, gápmasiid dikšut, duljiid navvit, riessut liinni, čuoldit, boahkániid ráhkadit ja veaskkuid goarrut.
Dál lea visti gos besset duddjot
Gaup lohká hui somán go lea nu stuora beroštupmi duodjekurssaide.
– Dakkár kurssaide lea leamašan stuora jearru, muhto mis ii leat leamašan vejolašvuohta doallat kurssaid go mis ii leat leamaš visti. Dál lea mis visti, gos beassat lágidit kurssaid.
Árbevirolaš dujiid oahpahit
Ulbmil manne sii leat válljen dakkár kurssaid doallat lea vai seailluhit duoji sin guovllus. Duodjeinstituhtta lea válljen geavahit báikkálaš duojáriid oahpaheaddjin kurssas, doalahan dihte guovllu árbevirolaš dujiid.
– Mii háliidit ovdánahttit árbevirolaš duoji čábbodaga.
Illudahttá sin
Mánáide lágiduvvo maid sierra kursa. Gaup muitala ahte dasa lea stuora beroštupmi, ja dat illudahttá sin go gili mánát ja nuorat háliidit oahppat goarrut árbevirolaš dujiid.
Háliidit eambbo bárdnemánáid kursii
Mánáidkursii leat searvan sihke nieiddat ja bártnit.
– Min jurdda ovddos guvlui lea čoarve- ja muorradujiiguin bargagoahtit, vai eambbo bárdnemánát servet kursii.
Mánát besset oahppat duddjot
Duodjeinstituhtta lea oastán iešguđetlágan ávdnasiid maiguin mánát sáhttet duddjot.
– Mis lea vejolašvuohta doallat dakkár kurssaid, go mis leat ávdnasat maiguin sii besset duddjot. Lea stuora illu go mánát besset oahppat duddjot, go sis lea beroštupmii dasa.
Vuordinlisttus leat olbmot
Daidda kurssaide lea leamašan stuora beroštupmi, ahte olbmot leat vuordinlisttus beassan dihtii searvat kursii.
– Mii lágidit gálssotgoarrunkurssa dál, ja das leat maid olbmot vuordinlisttus. Jus lea muhtin gii ii sáhte searvat, de fállojuvvo sadji dasa gii lea vuordinlisttus.
Áigot ain doallat kurssaid
Gaup lohka vel loahpas ahte dákkár kurssaid sii gal ain áigot lágidit go olbmuin lea stuora beroštupmi daidda, sihke mánáide ja rávisolbmuide.