Garra áitagat stádas
Eanandoallodirektoráhtta lea ráhkkaneame bákkus unnidit Jovsset Ánte Sara ealu vaikke Alimusrievtti duomu ii leat vel meannudan Ovttastuvvon Našuvnnaid (ON) olmmošvuoigatvuođalávdego ddi. Su vuostá leat garra áitagat go geahččá áššemeannudeami. Das lea sáhka ahte Eanandoallodirektoráhtta áigu ollašuhttit unnideami bággoollašuhttinlágain, sihke mávssihit sáhku ja njuovahit bohccuid. Boazodoalloeiseválddit leat ge dieđihan Jovsset Ánte Sarai, ahte sii áigot ollašuhttit mearrádusa boazodoallolága 79 paragráfa goalmmát lađđasiin. Das daddjo earret eará:
«Mearrádusaid vuosttaš lađđasa mielde sáhttá bággočađahit bággočađahanlága 13. kapihttala mielde. Mearrádusat čađahuvvojit bággočađahanlága § 13-14 mielde.»
Vuosttaš lađđasis dan bággoparagráfas lea ge maiddái «unnidit boazologu» dahje eará sániiguin, čađahit bággonjuovvamiid. «Bággoparagráfa» oidnet vejolažžan váldit atnui jus eará ráŋggáštemiiguin eai nagot unnidit ealuid. Das lea ge sáhka bákkus unnidit boazologu.
Boazodoalloeiseválddit leat juo 2014:s ráhkkanišgoahtán bággodoaimmaiguin unnidit boazologu siidaosiin mat eai doahttal unnidit gorrelogu mielde. Boazodoallostivrra 2014 beavdegirjjis boahtá ge ovdan, ahte leat guorahallan lágaid ja mot galget daid váldit atnui. Jovsset Ánte Sara lea vuosttaš geasa eiseválddit leat dieđihan bággonjuovvandoaimmaid. Dat lea duođalaš áitagat, go boazodoallostivrra beavdegirjjis boahtá ovdan, ahte dákkár bággodoaimmaid evttohit geavahit buot boazoeaiggádiid vuostá geat gullet siidaoassái, mii ii leat doahttalan unnidit ealu, ja goluid galget ieža siidaoasi boazoeaiggádat máksit. Evttohusas deattuha gal boazodoallohálddahus ahte dán paragráfa atnui váldin lea duođalaš, nu ahte das leat garra gáibádusat áššemeannudeapmái ja mot eiseválddit čađahit mearrádusa.
Dán láhkaguorahallamis lea Eanandoallodirektoráhtta, Álttás, oadjebas, ahte bággomearrádusat leat siskkobealde daid mearrádusaid mat gáibiduvvojit eamiálbmogiid ektui Vuođđolágas, Eurohpá olmmošvuoigatvuođaidmearrádusas ja seamma maiddái Ilo-konvenšuvnna mearrádusas. Juste dat soaitá ge ággan manne eai vuordde dainna áššiin, go leat juo 2014:s ieža gávnnahan, ahte sin mearrádusat eai rihko olmmošvuoigatvuođaid. Dan eahpidit mii garrasit, vaikke dan áššis lea stáda ožžon iežaset ásahuvvon Alimusrievttis doarjaga, ahte sáhttet bákkus unnidit Jovsset Ánte Sara ealu 75 heggii. Várohat ain dehálažžan vuordit dassážii go dát ášši lea meannudan Ovttastuvvan Našuvnnaid vuogádagas vai eiseválddit eai rihko roavvát olmmošvuoigatvuođaid hoahppodoaimmaiguin.
Jovsset Ánte Sara lea vuosttaš geasa eiseválddit leat dieđihan bággonjuovvandoaimmaid.