Jovsset Ánte Sara dievasčoahkkináššin
Runar Sammol Myrnes Balto oaivvilda ahte stáhta čájeha dohkketmeahttun fápmogeavaheami go eai vuollán vuordit ON olmmošvuoigatvuođalávdegotti meannudeami.
Norgga Sámiid Riikasearvvi (NSR) sámediggeáirras Runar Sammol Myrnes Balto muitala sii leat lokten Jovsset Ánte Sara ášši hoahppoáššiin Sámediggái. Sámedikki eanetlohku bovde dievasčoahkkima searválagaid NSR:IN cealkit čielgasit ahte stáda fámostallan Jovsset Ántte áššis ii leat dohkálaš.
– Mii gáibidit ahte Norgga eiseválddit vurdet njuovvangáibádusain dassái go ON olmmošvuoigatvuođalávdegoddi lea meannudan ášši, lohká Runar Sammol Myrnes Balto. Dievvasčoahkkin galgá odne meannudit ášši dievasčoahkkimis.
– Eai doahttal olmmošvuoigatvuođa mearrádusain
Runar Sammol Myrnes Balto čilge ášši lea hui dehálaš dan sivas go stáhta čájeha dakkár fámugeavaheami, go eai hálit vuordit ON olmmošvuoigatvuođa gieđahallama.
– Orru hui imaš ja čájeha measta ahte eai doahttal olmmošvuoigatvuođaid, ja jus nu lea, de lea hui duođalaš ášši. Rievtti mielde lea olles Jovsset Ántte ášši dehálaš ollu boazosápmelaččaide ja lea prinsihpalaš ášši go eai sáhte vuordit ja ášši čuohcá hui olu Jovsset Ántii, ja dan sivas leat mii mearridan reageret dál , čilge Balto.
Riikačoahkkinmearrádus
Mannan vahkkoloahpa lágidii NSR 45. riikkačoahkkima Guovdageainnus gos mearridedje doarjut nuorra boazosápmelačča Jovsset Ánte Sara.
– Jovsset Ántte eallu ii leat moktege áitta Finnmárkkuduoddara guohtonvuđđui, muhto bággonjuovvan dagaha stuorra váikkuhusat Jovsset Ántii ja su bearrašii. Dan ahte stáhta dál vállje badjelgeahččat dálá riekteproseassa ON vuogádagas lea badjelgeahččanvuohta, lohká Runar Sammol Myrnes Balto.
Dorjot NSR ja Jovsset Ántte
Nubbin storrámuš bellodat Sámedikkis, Bargiidbellodat, maid doarju NSR dán áššis.
– Lea riekta bissehit, ii leat riekta čađahit makkárge bággomearrádusa ovdal go ášši lea meannuduvvon ON:S. Lea hui vearrut dahkkon ráđđehusas ja dán láhkái eai galgga eiseválddit láhttet, lohká Bargiidbellodaga sámediggeáirras Ronny Wilhelmsen.