Nuorat eai dárkkis ahte suovvanjurggon doaibmá
Jus leat vuollel 30 ja orut okto, de lea jáhkehahtti ahte it gille iskat doaibmá go suovvanjurggon iežatásodagas.
Dáhkádussuorggit ávžžuhit molsut báhtteriid suovvanjurggonis dál juovlamánu. Yougov lea čađahan ođđa iskkadeami Frende Forsikring ovddas, mii čájeha ahte oallugat eai beroš buollinsihkarvuođas juovlamánus.
– Leat eanas nuorra olbmot geat okto orrot geat čájehit ahte sii eai beroš, dadjá Frende buollináššedovdi Øystein Øren preassadieđáhusas. Okta vihttasis dán joavkkus vástidit ahte eai muitte goas maŋemus iske doaibmá go suovvanjurggon, ahte eai dieđe goas maŋemus iske, dahje ahte eai leat dahkan dan. Sii leat studeanttat ja oahpahallit (21 %) ja nuorat geain ii leat bearaš (23 %).
– Dušše golmmas logi nuoras dadjet ahte isket suovvanjurggona oktii jahkái dahje jus dat njurgu, muitala buollináššedovdi. Buohtastahttin dihte isket čiežas logi olbmos, geat leat badjel 30-jahkásaččat, oktii dahje eambbo gerddiid jagis.
– Iskkadeamis ii boađe ovdan manne erohusat leat nu stuorrát, muhto bohtosat čájehit ahte nuoraid ferte muittuhit, dadjá Øren Frendes.
Suovvanjurggona galgá dárkkistit juohke mánu
– Suovvanjurggoniid berre dárkkistit mánnosaččat ja juohke háve go leat leamaš guhkebuš mátkkis. Báhttera berre molsut oktii jahkái, áinnas juovlamánu 1. beaivvi, mii lea suovvanjurggonbeaivi, dadjá Bergena buollindoaimmahaga Janicke Larsen.
– Suovvanjurggon sáhttá gádjut heakka, lasiha son. – Jus buolligoahtá du ruovttus, mađi jođáneappot beasat diehtit buollima birra, dađi jođáneappot beasat olggos. Jus suovvanjurggon ii doaimma, de ii leat sihkar ahte don gullát šat goasse, dadjá Øystein Øren.
Ná iskat
– Go deaddilat boalu, de dárkkistat dušše doibmet go báhtterat šat, ii dan ahte dat doaibmá jus buollá, dadjá Frende buollináššedovdi.
Vai leat áibbas sihkar, de berret dárkkistit suovain.