Buoremus bileahttajohtu
GÁIVUOTNA: Riddu Riđđu bijai 100 hálbbiduvvon festiválabileahta vuovdimassii skábmamánu loahpageahčen. Dál dieđihit iežaset Facebook-siiddus ahte bileahtat johtet bures.
– Riddu Riđđu ii leat goassege jođihan festiválabileahtaid ovdagihtii nu bures go dál. Jáhkkimis vuovdit bileahtaid ná bures go olbmot leat duhtavaččat artisttaiguin maid dássážii leat almmuhan 2019-prográmmas, čállá festivála.
Álgoálbmotjienat
Seammás go Riddu Riđđu bijai bileahtaid vuovdimassii, de alm- muhedje ahte golbma njunuš álgoálbmotnástti čuojahit oktasaš konseartta.
Festivála oainnat ovttastahttá Buffy Sainte-marie, Tanya Tagaq ja Maxida Märak. Sii galget ovttas buvttadit musihkkavásáhusa festiválagussiide, ja lágideaddjit lohpidit ahte olbmot eai goassege dán vajálduhte.
ISÁK ja Wiyaala
Maŋimuš beivviid lea Riddu Riđđu almmuhan vel guokte artistta geat čuojahit geasi festiválas. Sámi ođđa jiellat, Ella Marie Haetta Isaksen boahtá iežas joavkkuin ISÁK:IN ja son dadjá iežaset sakka illudit fas čuojahit álgoálbmotfestiválas mii lea dehálaš lávdu sámi musihkka- ja kulturgaskkusteapmái.
Gaskavahkku almmuhii festivála ahte maiddái ghanalaš popartistta Wiyaala boahtá Riddu Riđđui čuojahit. Son ovddida ja vuosttalda áššiid mat vealahit nissonolbmuid ja náitaleami mánáid gaskas. Wiyaaala lávlu iežas eatnigillii ja eŋgelasgillii. Su dovdomearka lea energiija lávddis ja su musihkka oažžu olbmuid dánsut ja buori moktii.