Direktoráhtta juohkán boasttu dieđuid Kárášjoga joatkkaskuvlla ohppiid birra
– Oahpahusdirektoráhtta juohká boasttu dieđuid, mii dagaha heajos beaggima, lohká beahtahallan inpektevra Sámi joatkkaskuvllas Kárášjogas.
Mannan vahkkus sáddii Máhttodepartemeanta preassadieđáhusa mas almmuhedje Oahpahusdirektoráhta (Udir) ođđa statistihkaid, mat čájehit man ollu ovttaskas joatkkaskuvla váikkuha dahje veahkeha buoridit ohppiid bohtosiid, oažžut ohppiid ceavzit ja fuolahit ahte oahppit eai heaitte. Udira loguid mielde heitet Kárášjogas buot eanemus oahppit oahppospesialiserenfágas, olles Norggas. Daid seamma loguid mielde cevze Kárášjoga ohppiin dušše njealjis guovttelogi oahppis, vuosttaš jagi. Muhto logut eai doala deaivása.
Oaččui šohka go gulai loguid
Kárášjoga joatkkaskuvlla inspektevra Trygve Guttorm lohká son oaččui njuolgut šohka go gulai medias makkár heaitin- ja ceavzinlogut sin skuvllas ledje.
– Mun dihten áibbas sihkkarit ahte logut eai doala deaivása. Earenoamážit go vuosttaš jagi oahppospesialiserenfágas ledje logut nie vuollin.
Guttorm muitala ahte vuosttaš jagi oahppospesialiserenfágas čađahedje ja cevze 19 oahppi guovttilogi oahppis.
Berrejit kvalitehtasihkkarastit loguid
Son muitala ahte son čuojahii Finnmárkku fylkkagildii gullan dihte makkár loguid sii leat almmuhan Udirii ja dalle son fuomášii boasttuvuođaid.
– Fuomášin de ahte Udir lea almmuhan loguid maid sii bidjet suoidnemánu 1. beaivvi, ja dat han leat dušše gaskaboddosaš logut eai ge loahppalogut.
Guttorma mielas ii leat dat vuogas veahá ge ja imaštallá makkár kvalitehtasihkkarastin lea Udiras. Son muitala maid ahte lea vuosttaš geardde go dát logut almmuhuvvojit dáinna lágiin ja dieđusge lea dalle hirbmat váivi go logut deive boastut.
Ii leat buorre skuvlla beaggimii
Guttorm lohká ahte go dákkár boasttu dieđut sáddejuvvojit Udiras preassadieđáhussan ja go deattuhuvvo vel ahte Finnmárku berre bargagoahtit dainna ahte logut buorránit, de dat váikkuha diehttelasat beaggimii.
– Dat han váikkuha negatiivvalaččat olles Finnmárkui, joatkkaskuvllaide ja earenoamážit min skuvlii. Diehttelasat addá hui heajos beaggima min skuvlii, ii ge dat leat buorre veahá ge.
Udir oaččui rievttes dieđuid ovdal go almmuhuvvojedje
Guttorm muitala maid ahte son attii Udirii dieđu boasttuvuođaid birra beaivvi ovdal go preassadieđáhus sáddejuvvui, muhto sii eai divvon.
– Mun čuojahin Udirii ja muitalin ahte leat boasttu logut, muhto sii lohke ahte sii liikká almmuhit daid.
Guttorm lohká ahte lea dieđusge nu ahte sis han leat olles Norgga logut maid almmuhedje ja várra lea áddjás bargu rievdadallagoahtit.
– Muhto ledje sáhttit vuordit almmuhemiin dassá go divvot. Dál gal vuorddán ahte sii njulgejit ja almmuhit boasttuvuođaid.
Ávvir ii ožžon Udiras oktavuođa ovttainge gii sáhtii vástidit áššái, ovdal go ášši deaddeluvvui.