– Norga addá heajos signálaid jus eai bisset bieggamillohuksemiid
Olmmošvuoigatvuođaid áššedovdi, professor Professor Bård Anders Andreassen, jáhkká Norgga billistit iežaset ovdii jus eai doahttal CERD ávžžuhusa bissehit huksemiid Fovsenis.
Komissára, mii hálddaša bargguid ON Nállevealahanlávdegoddái (CERD), lea juovlamánu 10. beaivvi ávžžuhan dalán bissehit bieggamillohuksemiid Åarjel Fovsen Njaarke guohtuneatnamiin, dassážii go CERD lea gárvvisin guorahallan ja buktán cealkámuša dán áššái. Sámiráđđi dat lea dohko váidán ášši dáid boazosámiid ovddas.
Vurdojuvvo ahte čuvvot
Professor Bård A Andreassen Norgga olmmošvuoigatvuođaguovddážis Oslo Universitehtas lohká Norgga dahkat stuora vahága jus eai čuovo dán ávžžuhusa.
– CERD ekspeartalávdegotti cealkámuš ii geatnegahte lágalaččat movtge, muhto lea hui garra normatiiva ja politihkalaš cealkámuš. Vurdojuvvo ahte sii geaid dát lávdegoddi rávve, doahttalit lávdegotti, dadjá Andreassen. Storheia bieggamillopárka Fovsen njárggas lea okta guđa bieggomillopárkkas man leat hukseme Trøndelágii dál, ja šaddá Eurohpá stuorámus bieggamillopárka eatnama nalde. Storheiai leat ceggeme 80 bieggaturbiinna. Dat šaddá Norgga stuorámus bieggamillopárka ja galgá plánaid mielde leat gárvvis 2019:s.
– Norga dárbbaša buriid ákkaid
CERD váidda lea dál Ráđđehusadvokáhta duohken, mii ii leat vel vástidan Ávvirii movt árvvoštallet ášši.
Professor Professor Bård A Andreassen lohká Norgga dieđusge sáhttit diktit Fosen Vind joatkit huksema, muhto das leat garra váikkuhusat ja addá hui heajos signála.
– Dát lea duođalaš ášši, masa galgá buriid ákkastallamiid buktit nu ahte ii duolmmo CERD lávdegotti ja olmmošvuoigatvuođaid. Jus ii doahttal, dat mearkkaša ahte duššin dahká dan lávdegotti, ja obbalaččat njeidet ge riikkat autoritehta go riikkat eai doahttal sin rávvagiid. Galgá oba olu ovdal go stáhtat eai čuovvol sin ávžžuhusa, dadjá Andreassen.
Professor oaivvilda ahte berre- šii erenoamáš várrogasat gieđahallat áššiid mat gusket álgoálbmogiidda.
Galbma biekkat
Muhto dáhkidit son ii gal duostta movtge ahte Norga doahttala CERD komissára gáibádusa.
– Dál bosodit feara makkár biekkat našunála dásis, ja leat eambbo vuosttaldeamit ja dorjot unnit ahte unnit dákkár áššiid. Dan vuohttit erenoamážit olgoriikkas, gos leat garrasit vuostálasvuođat ovdamearkka dihte báhtareaddjepolitihkas ja terrorvuostálastimis, ja oaidnit ahte olu riikkain gáržžidit ja jávohuhttet siviila servodagaid. Dat váikkuha maiddái Norgii.