Sierravuodjinlobiid berre njuovžilit meannudit

Guovdageainnu Dáloniid listtu suohkanstivrraáirras, Isak Mathis O. Haetta, evttohii ahte suohkanstivra addá válddii meahcástanstivrra jođiheaddjái johtilit juovllaide meannudit sierravuodjinlobiid ohcamiid. Son deattuhii dan erenoamáš dehálažžan Guovdageainnu nuoraide geat leat oahpu gazzame eará báikkiin, ja galggašedje juovllaid beassat vuodjit skuteriin go leat luomus. Haetta čilge ahte fylkkamánni maid geavaha luomuid áigge dakkár njuovžilis áššemeannudeami áššiin, vai áššit ovdánit. Muhto eanetlohku biehttalii meannudeames dan liigeášši. Lea dieđus hui heittot go eanetlohku ii gárron meannudit dan ášši, go de livčče goit juobe debáhtat šaddan.

Daid debáhtain dieđus álot sáhttá oaidnit makkár politihkka lea guđe ge bellodagas ja politihkkaris. Demokratiijas lea hui dehálaš ahte iešguđetlágan áššit digaštallojit rabasvuođas, go dušše das sáhttá jienasteaddji oaidnit makkár politihkalaš oainnut guđes ge leat. Danne ii leat ge dákkár politihkalaš sensureren buorre demokratiijii. Ii ge orron dan láhkai, ahte suohkanstivrras lei gáržžes áigi, go dan nuppi liigeášši, namalassii «Jovsset Ántteášši», gal aste meannudit vaikke dat lei ollu stuorát ja váddásit ášši. Dan ektui orru ge leamaš suohkanstivrras buorre áigi meannudit goappašat áššiid.

Sámeálbmot Listtu suohkanstivraáirras, Klemet Erland Haetta, gii maid lea ovddeš sátnejođiheaddji, čuoččuha dan ášši čájehit ahte suohkanstivra vuoruha eambbo boazodoalu go dáluolbmuid beroštumiid. Dat dieđus lea Haettas endorii álgit buohtastahttit dán guokte ášši seammaláganin, go «Jovsset Ántte-ášši» lea áibbas eará dimenšuvnnas go dat ahte olle go suohkan meannudit sierravuodjinlobiid barttaide ja eará meahcástanbáikkiide ovdal juovllaid. Dakkár buohtastahttimat dušše biđgejit sámejoavkkuid, go dan guokte ášši ii sáhte oba buohtastahttit ge.

Iešalddis dat bealli, go suohkan ii geargga sierravuodjinlobiid meannudit ovdal juovllaid, lea beare heittot, ja danne lea lohpi divvut dan gažaldaga, ahte lea go dat goansta mot goazadit dáluolbmuid vuodjima mehciin. Sávvamis ii leat dan láhkai. Isak Mathis O. Haettas ledje buorit ákkat addit válddi meahcástanstivrrajođiheaddjái, vai suohkana ássit besset meahccái go skutermáđijat eai leat vuos rahppon ja ollu nuorat bohtet ruoktot juovlalupmui. Ja go lea dan láhkai ahte meahcástanstivra ii doala šat čoahkkima ovdal juovllaid, de han gal livččii buorre vuohki delegeret dan válddi muhtun earái. Jus lea dan láhkai ahte eanetlogus ii leat luohttámuš iežaset válljejuvvon jođiheaddjái meahcástanstivrras, de han fertejit dan almmolaččat maid muitalit.

Danne ii leat ge dákkár politihkalaš sensureren buorre demokratiijii.