Gullon čoahkkimis
Iešguđetlágan dajaldagat lávejit sáhttit boahtit ovdan suohkanstivračoahkkimis, muhtun duođalaš dajaldagat, nuppit fas eai nu duođalaččat.
Johan Vasara, sátnejođiheaddji, Bargiidbellodat:
«Dáinna áššiin galget golbma suohkanstivrra bargat, vuos dat mii dál lea, boahtte válgaáigodaga ođđa suohkanstivra, ja vel loahpahit galgá dat maŋit suohkanstivraáigodat dán barggu» Go lei sáhka suohkana nuppástuhttinprošeavttas mii bista vihtta jagi, mas suohkan lea ožžon birrasii 6 miljovnna jahkásaččat boahtte vihtta jagi.
Kent Valio, Guovdageainnu suohkana ráđđeolmmai:
«Buorebut in sáhte vástidit viđa sekunddas» Go SÁL áirras, Klemet Erland Haetta, bivddii suohkanstivrra geahčadit iežas bealálašvuođa bušeahttamuddenáššis, mas lei sáhka doarjagis priváhta mánáidgárddiide, go Valio galggai suohkanlága mielde čilget lea go bealálaš vai ii. Haetta lea SSO jođiheaddji, masa maid guoská studeantamánáidgárdi mii lea priváhta.
Johan Vasara, sátnejođiheaddji, Bargiidbellodat:
«Giittán iežan sátnevuoru ovddas» Go lei doallan sáhkavuoru, ja de maŋŋel čohkkedii fas iežas sátnejođiheaddjestullui suohkanstivrras.
Klemet Erland Haetta, Sámeálbmot Listu:
«Doivon sátnejođiheaddji lei hupmame áibbas eará ášši birra, go ii namuhan obanassiige Máze mánáidgárddi, vaikke lei dan birra sáhka» Go sátnejođiheaddji álggahii Máze lagasbirasášši sárdnestuolus, ja Haetta bivddii sátnevuoru dan áššis.
Klemet Erland Haetta, Sámeálbmot Listu:
«Mun lea Mázes váccašan ja oaidnán rumašlaš duođaštusaid ahte doppe bargojuvvo doalahit mánáidgárddi» Go lei sáhka ahte Máze mánáidgárddis beare unnot mánát, masa Haetta ii lean ovttaoaivilis.
Klemet Erland Haetta, Sámeálbmot Listu:
«Oaččun go jearrat sátnejođiheaddji, manin Nils Johan Gaup šluvgá oaivvi go mun doalan sátnevuoru. Mu mielas lea heaboheapmi» Go Haetta lei bivdan replihka suohkanstivrras, ja go hupmat, de šluvgigođii Nils Johan Gaup (Bb) oaivvi.