Lea go ođđa áibmorusttet vai ii
Mii ii čielgasit boahtán ovdan suohkanstivrras lei ahte lea go Máze skuvllas ođđa áibmorusttet, dan geažis gosa mánáidgárdi dál galgá ásahuvvot, vai ii.
Okta dain áššin mii digaštallui hui olu Guovdageainnu suohkanstivrras mannan gaskavahku lei Máze mánáidgárddi sirdin skuvlii, nu šaddá ođđa Máze lagasbirasguovddážin.
Doppe lei sáhka man olu šaddá máksit divodit skuvlla, vai šaddá leat dohkálažžan leat mánáidgárdi.
Okta dain man birra digaštallui, ja mas ii oba boahtán ge čielga vástádus, ahte lea go Máze skuvllas, dan oasis gosa mánáidgárdi galgá ásahuvvot, ođđa áibmorusttet, vai ii.
Oassi gosa mánáidgárdi dál galgá, lea Mázeskuvllas dat oarjjabeale geahči, dat ođđasut geahči skuvllas. Boares geahči lea divvojuvvon, ja dohko lea maid biddjon ođđa áibmorusttet. Dat ođđaset geahči ge ii leat šat nu ođas, go lea huksejuvvon 30-40 jagi áigi.
Dan oktavuođas čuožžilii digaštallan, lea go dalle, go boarrásut geahči divvojuvvui, biddjon ođđa áibmorusttet, ođastuvvui go dat maid seammás dan ođđa geahčái. Suohkana hálddahusa bealis oaivvildedje ahte doppe galgá leat ođastuvvon áibmorusttet, seammás go ođastuvvui dan boaresgeahčái divodeami oktavuođas.
Klemet Erland Haetta (SÁL) oaivvildii ahte doppe ii leat ođđa áibmorusttet. Suohkana hálddahus fas oaivvildii doppe lea, muhto liikká eai sáhte sihkkarit dan dadjat.