Oaččui bálkkašumi dutkamiin boazodoalu árgabeaivvi birra
SÁNAG psykologaspesialista Snefrid Møllersen gii lea jođihan dutkanprošeavtta «Boazodolliid árgabeaivi», oaččui Finnmárkku buohcceviesu dutkanbálkkašumi.
Dutkanjođiheaddji Snefrid Møllersen lohká iežas hui rámis go leat ožžon dutkanbálkkašumi, ja atná dan árvvus.
– Lea nu buorre go min dutkan oaččui dákkár bálkkašumi, dál beassat vel eambbo dainna bargat ja loktet álbmogii dan.
Boazodoallit dahkan vejolažžan čađahit dutkama
Møllersen lohká ahte boazodoallit dat livčče galgan dan bálkkašumi oažžut, go dat leat sii geat leat buktán cealkámušaid ja geat leat dahkan vejolažžan čađahit dán dutkama.
– Dán dutkamis leat leamašan oallugat mielde, ja mun lean nu giitevaš go lea leamašan vejolašvuohta čađahit dan.
Ovddidit earáide
Bálkkašumi maid ožžo dutkamis, áigot sii geavahit prošektii.
– Dat ruđat bohtet buorrin, go dalle soaitá veaháš eambbo vejolašvuohta ovddidit earáide dan prošeavtta, maid mii leat čađahan.
Ii nu dábálaš dutkanvuohki
Prošeavttas leat geavahan veaháš eará dutkanmetoda mii ii leat nu dábálaš, metoda lea vižžon eamiálbmotdutkamis Amerihkás ja gohčoduvvon searvevuođadutkan. Dát lea dakkár ahte okta albmot ii dutkojuvvo, muhto dutkojuvvo ovttas máŋggaid álbmogiiguin. Dát dutkan lea ovttasbargu gaskkal SÁNAG ja Norgga Boazosápmelaččaid Riikkasearvvi.
Boazodoalu árgabeaivi
– Boazodoallu lea eallán ja eallá ain stuora hástalusaiguin ja dávgguiguin dan ektui go galgá doaimmahit buori boazodoalu, ja doalahit dan buori eallinvuogi ja searvevuođa nu movt boazodoallu lea vuođđuduvvon. Lea máŋggaid jagiid boazosápmelaččaid gaskkas celkojuvvon ahte boazodoalus leat ollu hástalusat, ja makkár vuorjašumiin sii ellet, mii guoská sin eallimii ja bargodillái, ja dasa las- sin vel sin psyhkalaš dearvvašvuhtii ja eallinárvui. Norgga Boazosápmelaččaid Riikkasearvi (NBR) jearai SANKS:S čađahit dutkama boazosápmelaččaid árgabeaivvi birra, čállá Finnmárkku buohcceviessu preassadieđáhusas.
Čalmmustahttit bargobirrasa ja eallineavttu
– Dutkan galgá čalmmustahttit mo Norgga boazosápmelaččaid bargobiras lea, ja dan psykososiálalaš eallineavttu birra. Dutkan soaitá ávki boazosápmelaččaide ja norgga dearvvašvuođa- ja bargoeiseválddiide. Dokumentašuvnnat sáhttet geavahuvvot go galget plánet doaimmaid mat gusket boazosápmelaččaid dearvvašvuhtii ja eallinárvui, čállá Finnmárkku buohcceviessu preassadieđáhusas. Bálkkašupmi lea 20.000 ruvnnu. Prošeavtta leat dorjon Sámediggi, Helse Nord RHF, Finnmárkku buohcceviessu HF, Boazodoalu ovddidanfoanda, Norgga boazosápmelaččaid riikkasearvi, Sámi našunála gelbbolašvuođabálvalus – psyhkalaš dearvvasvuođasuddjen ja gárrendilli.