– Mávssaheimmet diimmá vuoittáhallama
Diimmá finála joavkkut deaivvadedje fas finálas mannan sotnabeaivve, dán háve vuite álttá nieiddat ges 2-1 finálas.
– Lei nu buorre dovdu, lei hui dehálaš vuoitit go diibmá vuoittáhalaimet, justa fal Razzmatazz vuostá. Dál mii mávssaheimmet, lean nu movttet dál. Šattai hui gelddolaš ovtta gaskka, muhto dovden ahte mii hálddašat dán, lohká Iselin Haugen.
Mannan vahkkoloahpa lágiduvvo Førjulsturnering-spábbačiekčamat Kárášjogas. Miehtá Davvi-norgga ledje boahtán čiekčit. Buldoserčiekči Iselin Haugen rámidii lágideame ja lohká issoras somás vahkkoloahpa leamašan Kárášjogas.
– Lea leamašan alla leaktu sihke beaivet ja eahkedis, lohká son.
Felgen Orkester lágidii «en helg på felgen» mannan vahkkoloahpa maŋŋá go čiekčamat ledje nohkan, doalut mat geasuhedje eanaš čikčiid.
– Somá mánnávuođaovdagovaid časkit
Hans Norbye nahkehii eanemus moalai čiekčamiin ja maiddái nahkehii maŋemuš sekunddas spáppa mollii finálas, mii dagai ahte joavku vuittii dán jagáš Førjulsturneringa.
– Finálačiekčamat galget leat gelddolačča, lei buorre joavku gean deaivvaimet. Lei hui somá beassat sin vuostá čiekčat. Ledje boares mánnávuođaovdagovat joavkkus, Tom Erik Biti ja Nilax, lei somá časkit sin, lohká Norbye. Hans Norbye lohká ledje hui somás čiekčamat, ja maiddái sosiálabealli lea buorre.
– Dáppe lea álohii somá čiekčat, lohká ovddeš eliteráiddučiekči Hans Norbye.
Dássedis joavkkut
Nordlys valáštallansearvi lágidii Førjulsturnering- spábbačiekčamiid Kárášjogas. Lágideaddji Geir Michael Boine lea hui duđavaš dán jagi čiekčamiiguin, ja lohká hui somá go nu ollu nissonjoavkkut ledje dieđihuvvon. 10 nissonjoavkku deaivvadedje ja 11 almmáiolbmo joavkku.
– Lea mannan hui bures, leat leamašan buorit čiekčamat ja čiekčamat leat leamašan hui dássálagaid. Mun lean hui duđavaš, lohká Boine, guhte ii loga iežas lágideamen boahttejagi čiekčamiid.
Veterána moallafáktan
Sotnabeaivve go loahppagilvvut lágiduvvo, ledje ollu olbmot boahtán čuovvut čiekčamiid. Kárášjoga valáštallanviesus lei huikkas ja reaškkas.
Førjulsturneringa várra boarráseamos čiekči Johan Anders Biti (57) mielas lei hui somá čiekčat, ja lohká hui suohtas joavdat finá- lii. Son birgii erenoamáš bures sihke semifinálas ja finálas, muhto joavku bođii loahpas nubbin go vuoittáhalle finálas ovttain moalain.
– In lean plánen čiekčat, muhto go bearjadateahket jerre gillen go moallafáktan, go váillui joavkkus moallafákta, de serven, lohká Biti. Son muitala lea hui somá čiekčat ovttas nuoraiguin.
Ii mannan bures semifinálas
Nissonjoavkku Stil-čiekči Kamilla Høybakken ii lean nu duđavaš goalmmát sajiin, ja oaivvilda ahte sii livčče galgan nagodit vuoitit semifinála.
– Lean duđavaš go vuittiimet bronšafinála, muhto in leat duđavaš go eat nagodan vuoitit semifinálas. Mu mielas čievččaimet bures, muhto dán háve ii mannan bures, dadjá Høybakken.
Diibmá ii lean STIL joavku mielde, muhto muđui lohká searvan juohke jagi.
– Mu mielas lea somá beassat čiekčat ja maiddái deaivvadit earáiguin. Dán agis go mii leat dál, ii leat nu dávjá ahte midjiide lágiduvvojit čiekčamat, nu lea ge hui somá, lohká son.
Team Bmba bođii goalmmádin almmáiolbmuid luohkás.