Nuorat goarostedje girjjatgávttiid duodjekurssas
Guovdageainnus lágiduvvui duodjekursa «Duodji ja redesign» nuoraide, gos leat beassan viđa vahkus oahppat goarrut girjjatgávttiid.
Duodjekursii mii lágiduvvui Guovdageainnus ledje 10 nuora searvan. Okta ulbmiliin kurssain lei earret eará riggudahttit nuoraid giela, duddjoma bokte.
Movttiidahtti go háliidit seailluhit duoji
Kurssa duodjeoahpaheaddji, Sara Ellen Anne Buljo Eira, lohká iežas ilus go ná ollu nuorat háliidit oahppat duddjot.
– Lea movttiidahtti go nuorat háliidit seailluhit sámi árbevirolaš duoji. Ja dál go girjjatgákti lea šaddan nu bivnnut, ollu nuorat geavahit dan, ja de leage hui somá go válljejit dán goarrut.
Iluin gorrot dujiid
Buljo Eira muitala ahte nuorat leat dán viđa vahkus iluin gorron, sin ii leat gal dárbbašan bággestallat gárvvistit dujiid.
– Lei dat maid mun háliidin, ahte galget beassat gárvvistit gávttiid.
Ieža hutkat movt háliidit gávtti
Go kursa álggii, de manai duodjeoahpaheaddji nuoraiguin čikŋa gávpái oastit duodjeávdnasiid. Dasto galge nuorat ieža vadjat ja hutkat movt háliidit gávtti goarrut.
Gávttit maid sii leat gorron, leat iešguđegeláganat. Ii oktage leat gorron seammalágan gávtti go nubbi.
Duodji lea ealáskan
Vuosttaš maid Buljo Eira jurddašii go bođii jearaldat sáhttá go leat duodjeoahpaheaddjin, lei ahte lea buorre go dakkár fálaldat lea nuoraide.
– Earenoamážit duoji ektui. Mun oainnán ahte duodji lea ealáskan, ja dat lea hui buorre go min árbevirolaš duodji ja máhttu seailu.
Nuoratgeardi háliida oahppat duddjot
Son lohká iežas háliidit ahte duodji galgá seailut, go ovttagaskka lei duodji dego jávkamin. Muhto dál lohká ahte lea nuoratgeardi mii háliida oahppat.
– Lea buorre go dat lea ealáskan fas, duddjoma ektui.
Viđa vahkus oahppan ollu
Duodjekurssa oasseváldi, Sara Alice Gaup, lohká hui buorre go dákkár kurssat lágiduvvojit. Dán viđa vahkus lohká iežas oahppan hui ollu.
Lea vuosttaš geardde go Sara Alice goarru girjjatgávtti, go ii loga iežas šaddat ruovttus nu ollu duddjot.
– Dál beasan mun ruovttus geahččalit ieš goarrut. Muhto dieđus soaitá álggos veaháš hástalussan leat, go ii leat duodjeoahpaheaddji das lahkosis.
Viidáseappot oahpahit maid ieš lea oahppan kurssas
Son lohká kursa leamašan hui ávkkálažžan duddjoma ektui, go lea beassan oahppat ollu. Son lohká ge maid iežas beassat earáide oahpahit goarrut girjjatgávttiid, sidjiide geat dan háliidit. Dál áigu ge son goarrut vel eambbo girjjatgávttiid ruovttus.
Ođđa diŋggaid ja dujiid oahppat goarrut
Okta sis gii maid lei oassálastán kursii, lei Marit Inger Kristine Gaup, ja son lohká ge hui somán go dákkár kursii besset nuorat searvat.
– Dáppe beassá oahppat ođđa diŋggaid maid muđui ii soaitte oahppat ruovttus.
Seailluhit sámi duoji
Gaup ii leat ovdal gorron girjjatgávtti, ja dan gal lohká áigut joatkit ruovttus, dál go gearggai kurssas.
– Láven gal duddjot ruovttus, muhto girjjatgávtti in leat goasse gorron. Lea hui buorre go beassá vel eambbo oahppat goarrut dakkár kurssain, seailluhan dihte sámi duoji, loahpaha son.
Nuoraidviessu, Dine Fenger Lyn-