Sámi filbmafestivála VUORUHA šaddat stuorábun

Juovlamánu ovccát beaivvi lágiduvvui Dellie Maa filbmafestivála Ruoŧas. Guokte norgga beale sámi filmma čájehuvvoje, muhto eanemus beroštupmi lei «Gallokii». Dat lea ruvkeroggamiid birra sámi eatnamiin Davvi-ruoŧas.

– Lulli-sámi namma «Dellie Maa» mearkkaša «viimmat», dadjá áŋggirdeaddji ja festiválahoavda Oskar Njajta Östergren, gii lea lulli-sápmelaš ja lea lágidan festivála 2013 jagi rájes. Nu lei ge dál guđát háve go festivála lágiduvvui.

– Maŋŋel go ledjen jahkeviissaid ohcan doarjagiid lágidit eamiálbmotfestivála Ruoŧas, de loahpas menestuvai dat, muitala son Ávvirii.

– Buvttadeaddjit galget eamiálbmogat

Dellie Maa lea álot lágiduvvon Deartnás, Davvi-ruoŧas, gos orrot sullii 500 olbmo.

– Dat lea dehálaš lulli-sámi guovlu ja mun orun maiddái dáppe. Ovdal leat maid lágidan festivála Ubmis, Staares ja Stockholmas. Mis lea mihttu čájehit eamiálbmot filmmaid, go min mielas lea dehálaš ahte eamiálbmogiid jietna gullo.

– Soames háve

Oskar Njajta Östergren lohká iežaset soames háve čájehit filmmaid maid eai leat rešisseren dahje dahkan sápmelaččat, muhto leat dakkárat maid dihtet, ahte sámit leat váikkuhan ráhkadit.

– Okta dakkár ovdamearka lea dokumentárafilbma «Gallok». Muđui gal galgá rešissevra dahje buvttadeaddji leat sápmelaš dahje mánusa čállán sápmelaš, muitala Oskar Njajta Östergren.

Vuoruhit ovddas guvlui

Dán jagi lei festivála veahá unnit go dábálaš, go čájehedje filmmaid dušše ovtta beaivvi. Sis aŋkke lea leamaš miehtá jagi dáiddačájáhusat, teáhterat, logaldallamat ja konsearttat.

– Boahtte jagi lágidat stuorát doalu, mas lea govddit prográmma. Muhto lei somá čájehit máŋggaid sámi oanehis filmmaid dan jagáš festiválas. Leat ge ilbmagoahtán eambbo iešguđet lágan sámi filmmat mat leat sihke dokumen- tárat ja drámabuvttadeamit. Mii leat maid juohke jagi ovttasbargan Ubmi Eurohpálaš Filbmafestiválain gos maid čájehit muhtun filmmaid mat leat min festiválas, lohká Östergren.

Loahpas lohká Oskar Njajta Östergren iežas sávvat ahte festivála stuorru ja šaddá deháleabbo. Danne geahččalit boahtte jagi lágidit stuorábun go dan jagi.

Govven: Nina Andersson Oskar Njajta Östergren áŋgiruššá dan badjelii ahte eamiálbmot filbmafestivála Dellie Maa stuorru.

«Gallok» lea ruvkkiid birra Davvi-ruoŧas, muhto das oaidná maiddái viiddis vuovdeeatnamiid.

Govva: Egil Pedersen Nubbi dan guovtti norgga filmmain mat čájehuvvoje lei musihkkavideo «Stállu» mas lea sámi ráppár Slincraze mielde. Filmma lea rešisseren Egil Pedersen.