Mearridedje sihke duon ja dán
Finnmárkku fylkkadiggi válljii mannan vahkkus searvelávdegotti mii galgá ráhkkanit ovttastahttit Finnmárkku ja Tromssa. Seammás mearridedje maiddái sáddet proseassadieđu stáhtii.
Proseassadieđáhus lea čálus mas nubbi bealli dieđiha nuppi beallái ahte árvvoštallo stevdnet diggái ášši. Das galgá čilgejuvvot gáibádus manne árvvoštallet ášši diggái bidjat. Dieđiheaddji galgá maiddái nuppi beali ávžžuhit mearridit maid oaivvildit gáibádussii, ja manne dan dahket. Bealli geasa sáddejuvvo proseassadieđáhus galgá mearridit maid oaivvildit gáibádussii ja ákkasteapmái.
Finnmárkku fylkkasátnejođiheaddji, Ragnhild Vassvik, mielas lei dehálaš sáddet proseassadieđáhusa stádii.
– Mii oaivvildit ahte leat hui buorit ákkat dárkileappot geahččat proseassa mii lea dagahan bággoovttastahttima ja geahččat dan barggus lobálašvuođa. Seammás vuorddán ahte departemeanta dárkilit vástida dan, dadjá fylkkasátnejođiheaddji preassadieđáhusas.
Seamma mađe áirasat searvelávdegottis
Ovdal go Finnmárkku fylkkadiggi válljii searvelávdegoddái lahtuid, de lei gieldda- ja ođasmahttinministtar, Monica Maeland, mearridan ahte Finnmárkkus galget doppe maid 19 lahttu mii lea seamma mađe go Tromsas. Álggus lei dan láhkai, ahte Finnmárku lei unnitlogus. Dainna lea fylkkasátnejođiheaddji duhtavaš.
– Liikká ii galgga okta ge eahpidit, go Finnmárkku Bargiidbellodaga vuođđooaidnu lea ain dat, ahte bággoovttastahttin galgá bissehuvvot. Juste dan dihte leat ge sádden proseassadieđu stáhtii. Sivva manin nammadeimmet lahtuid searvelávdegoddái lei dat go oaččuimet seamma olu lahtuid dohko go Tromsa, lohká Vassvik.
– Ii lean dušši gižžu
Ragnhild Vassvik oaivvilda ahte gižžu vuosttaldit ovttastahttima ii leat mannan duššás, go leat ožžon seamma olu lahtuid go Tromsa searvelávdegoddái.
– Dan eat livččii olahan jus finnmárkulaččat eai lean nu garrasit áŋgiruššan dainna áššiin, lohká Ragnhild Vassvik.
Deaivvadan vuohččan
Mánnodaga lei searvelávdegottis vuosttaš čoahkkin Tromssas, ja proseassadieđáhus sáddejuvvo jođáneamos lági mielde.
– Ádden bures go olusat leat behtohallan. Mun lean maid dan. Giittán finnmárkulaččaid doarjaga ovddas ja sávan sin ain min doarjut. Mun dáhkidan dárkilit čuovvut mot proseassadieđáhus ovdána. Dan botta bargat áŋgirit Finnmárkku bealde searvelávdegottis, dadjá Vassvik loahpas preassadieđáhusas.