Dohkkehišgoahtán sisafárrejeddjiid
Norgalaččat eai leat šat nu eahpádusas ja leat dohkkehišgoahtán sisafárrema ja sisafárrejeddjiid buorebut, nu čájeha Statistihkalaš guovddášdoaimmahaga iskkadeapmi.
94 proseantta vástidit ahte sin mielas ii leat unohas jus ieža dahje earát lagaš bearrašis ožžot sisafárrejeaddji ruovttuveahkkin dahje ránnján.
– Eambbosat leat eahpádusas jus oččoše sisafárrejeaddji mannje- dahje vivvasássan, muhto dát oassi maid njiedjá, dadjá Statistihkalaš guovddášdoaimmahaga seniorráđđeaddi Frøydis Strøm NTB:I.
Ustibat ja bargoskihpárat
Guorahallan čájeha maiddái ahte dál lea dábáleabbot doallat oktavuođa sisafárrejeddjiin sihke bargosajis ja ássanguovllus. 79 proseantta dadjet ahte sis lea oktavuohta sisafárrejeaddji bargoskihpáriiguin dahje ránnjáiguin, 2002 vástidedje 67 proseantta dan seamma.
Juohke guđát ges muitala ahte sis leat sisa- fárrejeaddjit skihpáriid dahje oahppásiid searvvis. Dát lea badjel beliin lassánan 2002 rájes. Diimmá rájes ges 18 proseanttain.
– Mii oaidnit maiddái ahte oaivilat sisafárrejeddjiid birra bargoeallimis rivdet. Ovccis lohkásis dadjet ahte sisafárrejeddjiin berrejit seamma vejolašvuođat barggu ektui go norgalaččain, dadjá Strøm.
Kritihkalačča
Guorahallamis jearahit olbmuid maiddái sisafárrejeddjiid birra čálgoburiid ja kriminalitehta ektui. Juohke njealját dadjá iežas ovttaoaivilis čuoččuhussii ahte sisafárrejeaddjit geavahit buorrin sosiála čálgoburiid. Guđas lohkkásis eai leat ovttaoaivilis. 49 proseantta ges oaivvildit ahte sisafárrejeaddjit galget bidjat searaid vai šattaše ja ealáše seammaládje go norgalaččat. (©NTB)