Njeallje jagi maŋŋel RIBAHII SIIDAOASI
Son ozai ja oaččui siidaoasi Jillen-njaarke orohagas Norlánddas. Go lei bargagoahtán dan olis, de váldii Boazodoallostivra sus fas dan eret.
2013:s ozai Per Anders Kappfjell siidaoasi Jillen-njaarke orohagas Norlánddas. 2014:s son oaččui fylkkamánni bokte siidaoasi ja bargagođii dan olis. Njeallje jagi maŋŋel, juovlamánu 4. beaivvi 2018, de gesii Boazodoallostivra sus fas ruovttoluotta dan siidaoasi.
Dájuhuvvon
Kappfjell lohká iežas dájuhuvvon, go vuos lea ožžon siidaoasi ja bargagoahtán dan olis, muhto de fas dan gesset eret sus.
– Mu mielas lea oba ártet, go mun han lean bargan ja ožžon maid buhtadusaid dan olis go lea siidaoassi. Mun jáhkken dál beassat viimmat bargagoahtit bohccuiguin iežan siidaosiin mii lea maid áiggošin. Muhto de geassá Boazodoallostivra ruovttoluotta siidaoasi, lohká son.
Váidda
Kappfjell gulai ránnjáorohahkii, namalassii Voengelh-njaarke orohahkii. Doppe lea son bargan bohccuiguin vieljas siidaoasi olis. Go son ozai siidaoasi fylkkamánnis, de ledje orohagas ovttaoaivilis ahte sutnje galgá siidaoassi. Muhto doppe bođii váidda ovttas geas ii lean siidaoassi, muhto dan ii oro fylkkamánni váldán vuhtii.
Son gii váiddii sus ii lean siidaoassi iežas hálddus vuos dalle, go son lei bargame dan iežas háldui oažžut. Sus lei juo eará orohagas siidaoassi, ja de ii mannan dat nu njuovžilit ahte son galggai siidaoasi oažžut Jillen-njaarke orohagas. Dál son lea ožžon dan siidaoasi iežas háldui.
Guoros orohat
Jillen-njaarke lea juhkkon guovtti oassái geasset, oarjjit ja nuorttit siida. Sis lea dušše dálveorohat ovttas. Jillen-njaarke oarjjit siida lea dál guoros, go doppe ii galgga leat oktage dál siiddastallame geasset. Doppe galggai Kappfjell bargat iežas bohccuiguin.
– Dál in dieđe movt galggan dahkat. Árvvoštalan mannat viidáseappot dáinna áššiin, go in dohkket go eiseválddit nie dájuhit mu.
– Son gii váiddii, sus han ii lean riekti váidit, go sus ii lean siidaoassi. Manin dainna leat ádjánan nu guhká čielggadit, ii dat sáhte šat munnje vahágin leat, lohká Kappfjell. Per Anders Kappfjell lei bivdán Boazodoallostivrra rievdadit mearrádusa man diibmá ledje mearridan, ahte váldit sus eret siidaoasi fas. Dan ii doahttalan Boazodoallostivra čoahkkimis juovlamánu 4. beaivvi dán jagi, muhto mearridedje jođiheaddji duppaljienain ahte eai rievdat mearrádusa váldit sus siidaoasi eret fas.
Ávvir ii lihkostuvvan boazodoallostivrra jođiheaddjis oažžut kommentára ovdal go aviisa deaddiluvvui.