Háliidit ovddidit duoji boahtteáiggediđolaš ja geasuheaddji ealáhussan
Sámedikki mihttomearri duoji hárrái lea oččodit eanet duojáriid geain duodji lea ealáhussan. Sámediggi háliida ovddidit duoji boahtteáiggediđolaš ja geasuheaddji ealáhussan, ja háliida buoridit ealáhusa ámmátčehppodaga, dietnasa ja gánnáhahttivuođa.
Duodjeinstituhtta lea fitnodat mas lea guhkes árbevierru ja dehálaš rolla duoji bisuheamis ja ovddideamis. Duodjebagadallanortnet lea olu jagiid leamaš DI hálddašeamis ja das leat mielde bagadallit miehtá Sámi.
– Sámediggi háliida vuosttažettiin diehtit guđe muddui Duodjeinstituhtta veahkeha olahit Sámedikki mihtu duoji hárrái. Mii háliidit maiddái diehtit geat ávkkástallet instituhta iešguđetlágan fálaldagaid, ja man duhtavaččat geavaheaddjit leat fálaldagaiguin. Sámediggái lea dehálaš diehtit eambbo ealáhusbargiid dárbbuid birra, ja guđe muddui Duodjeinstituhtta nákce gokčat ealáhusa dárbbu. Sámediggi háliida maiddái diehtit eambbo guđe muddui bagadallanvirggit gokčet duodjeealáhusa gelbbolašvuođadárbbu, dadjá sámediggeráđđi Berit Marie Eira preassadieđáhusas.
Stuora vuordámušat
– Telemarksforskning áigu váldit oktavuođa válljejuvvon duojáriiguin ja ealáhusbargiiguin. Mii ávžžuhit buohkaid bures váldit vuostá Telemarkforskninga ja dan barggu mii galgá dahkkot. Sámediggeráđis leat stuora vuordámušat evaluerema bohtosiidda, ja mii sávvat ahte evalueren addá buori vuođu viidásit strategiijaid árvvoštallamii duodjeealáhusa čuovvoleami ja ovddideami ektui, loahpaha sámediggeráđđi Berit Marie Eira.