Čálii mánáide elliid ja lottiid birra
Ovdal go mánáidgirječálli Ingunn Olsen jámii diibmá, gearggai gárvet faktagirjji buot elliidbirra sihke sáme- ja dárogillii vai buot mánát sáhttet oahppat daid birra.
(2002) ja «Irina stoahká/irina leker» (2009) ja «Šattut/planter» (2011). Buot girjjit sihke sáme- ja dárogillii.
– Ingunnii lei dehálaš čállit sihke sáme- ja dárogillii vai buohkat áddejit, erenoamážit olahit daid mánáid geat eai máhte sámegiela, vai sii ge besse lohkat girjjis buot dábálaš elliid ja lottiid birra dáppe davvin. Lea hui olu dieđut dán girjjis ja heive buot ahkásaččaide, joatká Nan Persen.
Son beroštii hui olu liđiin, lottiin ja ealliin davvin ja máhtii olu daid birra. Girjái lea maid čállán šattuid ja ealliid nama láhtengillii. Juohke siiddus lea gurot bealde muitalus ja olgeš bealde ges faktadiehtu dan lotti dahje ealli birra.
Čálii maid mánnán váillahii
Mearrasápmelaš Ingunn Olsen riegádii 1953:s Lávvonjárggas Deanu gielddas ja ásai Soggovuonas Porsáŋggu gielddas go jámii. Sus lea guokte maŋisboahtti, Anita Nilsen ja Arild Nilsen geat guktot ássaba máddin.
– Son váillahii dákkáraš girjjiid mánnán. Dovddai ii lean albma dáža, ii ge albma sápmelaš. Danin čálii son guktui gillii vai olaha buohkaid geat eai máhte sámedahje dárogiela nu bures. Eadni áiggui deike máttás fárret go girji gárvána, muitala Anita Nilsen.
Somás bargu
Hermod Karlsen lea sárgon govaid girjjis. Son ássá Fredrikstad gávpogis. Vaikko lea fitnan Finnmárkkus, de leamaš sutnje hástalus sárgut Finnmárkku luonddu ja doaivu lea nagodan sárgut nu mo dán guovllus lea.
– Tevdnen eanaš luonddu, ealliid ja lottiid ja liikon leat hui dárkil go daid tevdnen. In leat nu hárjánan olbmuid sárgut ja dat leamaš oalle hástalus. Ingun beasai oaidnit eanaš dáid sárgumiid ovdal go vádjolii. Leamaš hávskkes ovttasbargu Ingunnin ja lágádusain, lohká Hermod Karlsen.