Hárjeheaddji HEAITÁN
Balto lei Nordlys a-joavkku hárjeheaddji ovtta áigodaga ovdal go dál šaddá váldohárjeheaddji Porsáŋggus. – Supertaleanta, dadjá ovddeš hárjeheaddji.
Go Balto válddii badjelasas hárjeheaddji barggu Nordlysas, de lei Kárášjoga joavku okta njunušjoavkkuin Finnmárkku 4. divišuvnnas. Ovtta áigodaga maŋŋel lea Nordlys okta dain joavkkuin 4. divišuvnnas geat rahčet vuolemusas. Dál váldá Balto badjelasas hárjeheaddji barggu joavkkus mii diibmá bođii nubbin Finnmárkku 4.divišuvnnas.
– Mis gal eai leat makkár ge eahpádusat Ole Marcusa čehppodahkii, vaikko Nordlys ii lean seamma buorre diibmá go ovddit jagi. Dat ii leat álo dušše hárjeheaddji sivva go okta spábbačiekčanjoavku vuoittáhallá čiekčamiid, dadjá ovddeš hárjeheaddji Stig Werner Einvik.
Balto váldá badjelasas váldohárjeheaddji barggu Porsáŋggus maŋŋel go Stig Werner Einvik lea diibmá jođihan joavkku. Einvik loktii Porsáŋggu gávccát sajis 2017:s nuppi sadjái 2018:s.
Ole Marcusa premissaid vuođul
Einvik muitala ahte son bargá guolásteaddjin ja go dál manná fas bargui de ii boađe Porsáŋgui ovdal giđđat.
– Go giđđa boahtá, de lean mun fas mielde hárjeheaddjijoavkkus, veahkkin Ole Marcusii, muhto dušše doppe gos Ole Marcus dárbbaša veahki ja buot lea dieđusge Ole Marcusa premissaid vuođul, dadjá son.
Einvik muitala viidáseappot ahte son lea gávcci jagi bargan Morten Gamst Pedersena ráđđeaddin ja nu lea ge maid čuvvon Blackburn nammasaš joavkku hárjehallamiid. Danne ii leat ge nu álki suorggahahttit su spábbačiekčanmáhtuin.
– Go Ole Marcus ovddidii iežas oaiviliid ja bargovugiid midjiide, de son gal duođaid čájehii makkár taleanta son lea. Ja son boahtá maid ovdánit hárjeheaddjin jagis jahkái, dadjá Einvik.
Stuora boahtteáigi
Vaikko Balto vuosttaš jahki Finnmárkku 4. divišuvnnas ii mannan nu bures, de lea Porsáŋggus buorre jáhkku ahte Balto lea rievttes olmmoš hárjeheaddjin sidjiide.
– Nu go dadjen, de ii leat álo hárjeheaddji sivva jus ii mana bures spábbačiekčanšiljus. Muhto sáhttá maid leat nu ahte Ole Marcus lea oahppan ollu dan jagis go son lei Nordlys hárjeheaddji. Mis lea buorre jáhkku Ole Marcusii ja su prošektii. Ja mun gal jáhkán ahte go son oažžu moadde jagi min luhtte, de lea son gearggus ollu stuorit hárjeheaddji bargguide, dadjá Einvik.
Dál lea Porsáŋgu bargamin doalahit seamma čikčiid geat diibmá ledje mielde, dan seammás go sávvet ahte ođđa nuorra čiekčit lávkejit lávkki a-jovkui. Diimmá ráidočiekčamis ledje logi čiekči mielde geat ain leat doarvái nuorat čiekčat ahkemearriduvvon spábbačiekčama.
– Mis orru dál čuvges boahtteáigi. Mii leat oažžugoahtán ortnegii administratiiva osiid ja buriid hárjeheddjiid nuorat čikčiide, dan seammás go mis lea dál supertaleanta hárjeheaddjin a-joavkkus. Dan seammás leat maid ollu nuorra čiekčit geat fargga leat gearggus lávket a-jovkui. Diibmá ledje moadde ahkemearriduvvon čiekči geat čikče ollu čiekčamiid, muitala Einvik.
Rievttes áigi
Go Ávvir humada Ole Marcus Baltoin, de lea son Walesas gos vázzá skuvlla. Son muitala ahte Porsáŋggus ledje čielga plánat ja jurdagat ovttasbarggu birra.
– Mu mielas lei dál rievttes áigi vuolgit viidáseappot ja geahččalit ođđa hástalusaid, hárjeheaddjin eará jovkui, olggobeale Kárášjoga. Porsáŋggus ledje maid hui čielga jurdagat ovttasbarggu birra, ja min jurdagat eai lean nu guhkkálaga, dadjá Balto ovdal go vel lasiha:
– Mun in boađe rievdadit buot, dušše hukset viidáseappot dan mii diibmá lea dahkkon.
Ollu jurdagat
Ovdal go Balto lonuhii joavkku, de lea ollen jurddašit ollu. Porsáŋgu lea hui seamma dilis dál go dan maid Nordlys lei go Balto válddii badjelasas Nordlysa. Balto čujuha ieš ovtta stuora erohussii:
– Dat mii lea stuorimus erohus lea ahte diimmá váldohárjeheaddji ii háliidan šat joatkit váldohárjeheaddjin. Mun lean smiehttan ollu, lea go dá rievttes válljen mu karriearas, ja lean maid de gávnnahan ahte Porsáŋggus leat čielgasit plánat gitta stivrra rájes. Porsáŋggus leat maid eambbo olbmot joavkku birra, ja sii leat ollu jagiid jo leamaš okta njunuš joavkkuin Finnmárkku 4. divišuvnnas.
Supertaleanta
– Go moarsi maid lea ožžon barggu Porsáŋggus, de heivii munnje maid hui bures ahte ožžon Porsáŋggus vejolašvuođa. Boahtte áigi lea mii čájeha lean go váldán rievttes mearrádusa, muhto ieš mun gal jáhkán dan. Doaivumis ii leat Porsáŋgu stuorimus hástalus mu karriearas.
– Stig Werner dajai ahte Porsáŋgu lea ožžon supertaleantta hárjeheaddjin, máid dan birra jurddašat?
– Stig Werner lea hui čeahppi dadjat stuora, čáppa sániid. Daid sániid ovddas mun giittán. Mus lea hui ollu oahppat sihke Stig Werneris ja Reidulfas, Porsáŋggus, loahpaha Ole Marcus Balto.