– Ii oro oba duohta ge, lea stuorra gudni
Lávvardateahkedis bálkkašuvvui kárášjohkalaš Doris Nordbye Norgga «Dán jagáš áŋggirdeaddjin», Valástallangállá oktavuođas Stavangeris.
Kárášjohkalaš Doris Nordbye oaččui eanemus jienaid olles Norggas eará eaktodáhtolaš bargiid gaskkas geat ledje nammaduvvon «Årets ildsjel», «Dán jagáš áŋggirdeaddji 2018».
– Ii oro oba duohta ge, lean hui rámis ja lea stuorra gudni oažžut dakkár bálkkašumi, lohká Doris Nordbye (65). Son lea 50 jagi leamašan vuodjanbirrasis, ja muđuid maiddái oidnosis eará valáštallansurggiin.
Giitá buohkaid
Finnmárkku Valáštallanbiire lei evttohan Kárášjoga Vuodjansearvvi jođiheaddji Doris Norbye «Dán jagáš áŋggirdeaddjin». DavviNorggas ledje 18 evttohasa ja daid searvvis lea Doris Norbye válljejuvvon Davvi-norgga evttohassan.
– Mun giittán buohkaid geat leat jienastan mu, ja maiddái sii geat ledje nammadan mu dán erenoamáš gudnejahtti bálkkašupmái. Lea hui somá ja nu go mun dál lean ádden, de lea hui allaárvvolaš bálkkašupmi, ja soaitá leat stuorámus bálkkašupmi man olmmoš sáhttá vuoitit, lohká Doris Norbye.
Ii stađa čohkkát
Son ii loga liikot čohkkát TV geahččat, muhto sihke bargoeallimis ja astoáiggis liiko veahkehit olbmuid. Doris Norbye bargá Kárášjoga vuođđoskuvllas oahpaheaddjin.
– Liikon bargat olbmuiguin, oahpahit olbmuid ja oaidnit dan ilu go máhttigohtet. Muhtumat liikojit čohkkát TV geahččat, mun in dan stađa, čaimmiha son.
Dehálaš bargu
Doris Nordbye lohká iežas bargat eaktodáhtolaš bargguid nu guhká go nákce.
– Eaktodáhtolaš barggut valáštallanbirrasis leat dehálaččat, mii dagaha ahte Norggas leat buorit valáštallit, dadjá son.
Áidna valáštallan mainna sáhttá jápmit
– Vuodjan lea mu váimmu laga- muččas. Dat lea dat áidna valáštallan mainna sáhttá jápmit jus ii dan hálddaš. Mun áiggun joatkit barggu loktet njealjátluohkkálaččaid gaskkas vuodjam. Giittos eatnat, dajai Doris Nordbye Valáštallangállá lávddis.
Idrettsgalla/valáštallangállá lágidit NRK, Norgga valáštallansearvi ja Norsk Tipping.