– Mis lea vuolggasadji ahte leat vuostá ruvkedoaimmaide
Sámeálbmot Listtu njunuš lei mielas 2013:s čađahit váikkuhusguorahallama Arctic Gold AB Biedjovákkeáššis, ja dál son lohká sin bellodaga vuolggasadjin leat ahte leat ruvkedoaimmaid vuostá.
Go Guovdageainnu suohkanstivra meannudii Arctic Gold AB plánaprográmma 2013:s, de manai suohkanstivra vuostá plánaprográmma logiin jienain ovcci jiena vuostá.
Unnimusat guokte bellodaga juohkásedje jienasteami oktavuođas dalle, namalassii Olgešbellodat ja Sámeálbmot Listu. Sámeálbmot Listtu njunuš, Klemet Erland Haetta, lei okta gii lei mielas čađahit váikkuhusguorahalama mii lei oassi plánaprográmmas.
Vuolggasaddjii
Haetta ii loga iežas sáhttit dadjat «juo» dahje «ii», go Ávvir jearrá livččii go son fas mielas váikkuhusguorahallamii Biedjovákki ruvkeáššis, go dál lea Arctic Minerals AB (ovddeš Arctic Gold AB) ohcan ja ožžon rogganrievtti njealji guvlui Biedjovákkis.
– Diet ii leat ášši dál mu mielas, go mis eai leat dieđut dál movt ruvkefitnodat áigu bargat, ja de lea váttis dasa dadjat maidege. Sáhtán dadjat goit ahte min bellodaga vuolggasadji lea ahte mii leat ruvkedoaimmaid vuostá, lohká son.
Ii rievdan oaidnu
Vaikke vel lea ge su bellodaga vuolggasadji ahte leat vuostá ruvkedoaimmaide sámi guovlluin, de Haetta čilge iežas oainnu mearrádusaid dáfus.
– Muhto mus ii gal leat rievdan oaidnu dan dáfus ahte dárbbašan dieđuid man vuođul mearridan, nu go mus lei oaidnu 2013:s váikkuhusguorahallama ektui. Go visot mearrádusain galgá duogáš leat ahte mus leat dieđut dahkat doarvái buori mearrádusa, ii fal einnosteami ja dovdduid vuođul, muhto dieđuid, lohká Haetta.
Son deattuha ahte ii leat dan dihte mielas ruvkedoaimmaide, muhto dat guoská su oainnu mielde visot áššiide.
Haetta iige leat dadjan vuolgá go son šat iežas bellodaga ovddas suohkanválgii, muhto ii biehttal ge gal Ávvirii dan gažaldahkii.