Nordlys ohcamin hárjeheaddji
– Spábbačiekčan lea nu ahte muhtimin mii massit čikčiid ja hárjeheddjiid, dadjá Nordlys stivrralahttu.
Mannan vahkus ohcagohte Nordlysii ođđa hárjeheaddji. Joavku lea maid jo hárjehallagoahtán boahtte áigodahkii, hárjeheaddji haga.
– Nu go dál lea dilli, de mis ii leat hárjeheaddji. Mis leat listtus moadde nama, muhto mun in sáhte addit makkár ge namaid ovdal go dieđán eambbo. Lea eará lávdegoddi gii galgá gulahallat hárjeheddjiin, dadjá Nordlysa Lemet Ailo Holmestrand, ja joatká:
– Dat lea suddu go Ole Marcus guođđá min dušše ovtta áigodaga maŋŋel, muhto ii dasa sáhte maidege. Nie lea spábbačiekčan. Mii leat mannan vahkus álgán hárjehallat boahtte áigodahkii ja mii hárjehallat goit ieža dassážii go ođđa hárjeheaddji lea sajis.
Oaččui fálaldaga
– Son gii diibmá lei hárjeheaddji lea heaitán, nu ahte mis ii leat dál hárjeheaddji. Mii fálaimet sutnje vejolašvuođa joatkit hárjeheaddjin, muhto son ii váldán vuostá fálaldaga. Mii leat bargamin ođđa hárjeheaddji boahtte áigodahkii, dadjá Nordlysa jođiheaddji Egil Olli.