Duodječájáhus rahpá Sámemusea Siidda
Sámemusea Siidda jagi 2019 vuosttaš čájáhus lea duodječájáhus «Eatnama fámolaš jienat». Čájáhus duojár Jouni S. Laiti dujiin lea geahčastat sámi duoji otnábeaivái. Čájáhus addá galledeaddjái vejolašvuođa beassat oaidnit dálá sámi duoji, sihke árbevirolaš
Dujiiguin Jouni S. Laiti muitala sámi čábbodatipmárdusas ja materiálageavaheamis otná dili. Dasa lassin Laiti duojit maid buktet ságastallamii duoji eallinvuoimmi otná máilmmis ja speadjalastá mii Sámis ja máilmmis sámiid birra dáhpáhuvvá.
Siskkáldas gulahallangaskaomiin
Muhtin dujiiguin Laiti váldá dihtomielalaččat oasi dálá servodatságastallamii. Laiti mielas duodji ii leat sámiide dušše vuohki buvttadit ávdnasis diŋggaid, muhto dat lea okta sámiid siskkáldas gulahallangaskaomiin, giella man ipmirdit dat, geat leat dán oahppan dulkot.
Laiti vuohki searvat servodatságastallamii dujiid ja duddjoma bokte lea okta ovdamearka sámi jaskes servodatságastallamis.
Áŋgirušša ovddidit duoji ealáhussan
Duojár ja duodjeoahpaheaddji Jouni S. Laiti lea eret Ohcejoga siste. Son lea guhká oahpahan garraduoji Sámi oahpahusguovddážis Anáris ja lea barggustis leamaš beroštuvvan earenoamážit duodjeoahpaheami gárgemis ja duodjegiela seailluheamis. Son lea maid áŋgiruššan ovddidit duoji ealáhussan, movt duojár sáhtášii ealihit iežaset duddjomiin ja movt duoji ja duddjoma galggašii márkanfievrridit vejolaš osttiide.
Čájáhus oassi duodjemaster barggus
Aiddobáliid Laiti lea gárveme duoji master dutkosa Sámi Allaskuvllas Guovdageainnus ja dát čájáhus lea oassi Laiti duodjemasterbarggus. Laiti Ma-loahppabarg- gu ja čájáhusa bagadallit leaba duodjeáššedovdit Tuula-maija Magga-hetta ja Sigga-marja Magga.
Čohkke dieđuid oassin loahppabargui
Okta su čájáhusa mihttomeriin lea gulahallat gehččiiguin ja oažžut sis máhcahaga dovdduin ja vásá- husain maid dujiid oaidnin sis bohciidahttá. Danin čájáhusas Sámemusea Siiddas lea gažadeapmi mii lea čujuhuvvon čájáhusa gallededdjiide. Gažadeami vehkiin čohkkejuvvon dieđut šaddet oassin Laiti čálalaš loahppabarggu váldogáldomateriála.
Eatnama fámolaš jienat – čájáhusa buvttada Sámemusea Siida, ja dasa beassá oahpásnuvvat 8.beaivvi ođđajagemánus gitta njukčamánu 10.beaivái. Dálveáigge Siida lea rabas disdagas sotnabeaivái diibmu 10–17, mánnodagaid lea Siida gitta.