Gávdne dán miesi BÁHČČON
Boazoeaiggádat gávdne miesi mii lei buot varran ja skierpmui. Go ožžo miesi gitta, de fuomášedje ahte miessi lei báhččon golmma sadjái.
Nu lohká Ruoŧa beale boazoeaiggát Lars-thomas Persson, Jiellevári vuovdečearus.
– Man guhká miessi lea bážasin leamaš ja biinniduvvon, dan lea váttis diehtit, lohká Persson.
Gávdne miesi mii lei báhččon
Lei ovdalaš ođđajagi go boazoeaiggádat ledje čohkkeme ja vuojeheame ealu gárdái Nahteváris Jiellevári guovllus go fuomášedje skierbmá miesi, mii lei buot varran čeabeha ja čoamohasa bokte.
– Go olliimet ealuin gárdái, de mii vulggiimet ohcat fas miesi, go mii balaimet juo ahte miessi sáhttá báhččon.
Go sii gávdne miesi, de sii giehtadedje dan ja njalde duolji. Dalle sii oidne luođđaráiggiid.
– Ledje golbma čielga luođđaráiggi, nu ahte mii riŋgiimet politiijaide dalán, ja sii gal bohte jođánit báikái.
Politiijat iske miesi ja duođaštedje ahte miessi lea báhččon, muitala Persson.
Eai dieđe vuos leat go eambbo bohccot báhččon
Persson muitala ahte sii gávdne maid stuorra ronu jápmán, sullii seamma sajis gos miessi gávdnui. Rotnu lei ollen borrojuvvot juo eará meahcceelliide, nu ahte politiijat eai sáhte áibbas sihkkarit lohkat ahte lea báhččon. Muhto boazoeaiggát ii gal eahpit.
– Stuorra rotnu gal báljo ii jáme lunddolaččat, diekkár báikái. Mun gal lean measta áibbas sihkar ahte lea báhččon dat maid.
Son muitala ahte dálkki geažil eai leat vuos leamaš ohcame leat go eambbo bohccot báhččon, nu ahte eai dieđe vuos man stuoris vahát lea dán háve.
Áiggiid čađa dáhpáhuvvan
Jiellevári vuovdečearus leat áiggiid čađa bártidan boazobiinnidemiin, báhčimiin ja boazosuoládemiin.
– Dát dagut leat leamaš dán guovllus álo, mu dieđu mielde. Ii dás šat oro oba loahppa ge.
Persson ii ge loga diehtit mii leaš mii dagaha ahte dakkár barggut dahkkojit.
– Doaivvun leat sihke dakkárat geat eai liiko boazosápmelaččaide ja bohccuide, muhto maiddái boazosuollagat, geat eai gille oastit bohccobierggu.
– Dát jallodat ferte nohkat
Dál gal lea Persson duođai dolkan dán fasttes virrui ja lohká dál lea áigi ahte dát boazobiinnideamit ja boazosuoládeamit nohket.
– Mis leat doarvái hástalusat boraspiriiguin ja ruovdemáđijaiguin, nu ahte juoba dát jállodat ge galggašii nohkat, lohká son suhtuin.
Son lohká vel loahpas ahte su mielas lea buot vearrámus jus dat suohttasa ja biinnideami dihte báhčalit bohccuid.
– Ii leat leaika go eallit bážasin mannet meahccái, ja doppe biidnahuvvet vaikko man guhká, dassážii go de loahpas jápmet.
Eai vuos várohan ovttage
Jiellevári politiijaguovllu politiijabálvá Eva Sjöström lohká ahte sus leat vuos unnán dieđut ášši birra go lea aiddo boahtán luomus. Muhto son diehtá ahte ášši lea váidojuvvon ja sis, su dieđuid mielde, ii leat oktage vuos gean várohit báhčán bohccuid.
Go Ávvir jearrá maid sii barget áššiin ja lea go vuoruhuvvon, de ii sáhte dasa vástidit nu ollu.
– Mun ferten iskat ášši ovdal go sáhtán vástidit maid ja movt mii bargat áššiin. Muhto dieđán goit ahte mis ii leat oktage vuos gean várohit báhčán bohccuid.