150 soalddáha boahtán Porsáŋgui
Iŋggášguolbanii leat boahtán birrasii 150 soalddáha, go Suodjalus galgá nannejuvvot Finnmárkkus.
Soalddáhat leat vuosttaš lávkin dan ođđa bataljovdnii ja Iŋggášguolbanaleairra ođasmahttimis Porsáŋggu gielddas.
500 soalddáha gildii
Ođđa Kavaleriijabataljuvdna ja ođđa Jegerkompaniija Garnisonenis Mátta-várjjagis bohtet dovdat ahte veahka lea nannejuvvon. Rekruhtta- ja fágaskuvla galgá álggahuvvot čakčat, ja galgá maid investerejuvvot máŋgalot miljovnna ruvnnu ođđa infrasturkturii Iŋggášguolbanii.
– Jagi 2025 rádjái galget leairras leat birrasii 500 soalddáha ja befála. Doaimmat mat biddjojit johtui, lea oassi ovdáneamis ja ođasmahttimis Finnmárkku riikkasuodjalusas maid Stuorradiggi lea mearridan, čállá Finnmárkku riikkasuodjalushoavda oberst Jørn Erik Berntsen .
Militeara doaimmat guovllus
– Ássit gielddas ja guovllus vásihit álgovuorus jámma militeara doaimmaid, nu go boares Jegerkompaniija ja Ruovttosuodjalus befálaskuvlla doaimmat ledje Iŋggášguolbanis 6-7 jagi dás ovdal, dieđiha oberst Jørn Erik Berntsen.
– Lossat ja váttis stivret
Stuorámus erohus dál Iŋggášguolbanis lea ahte stuorra pánservuojánat lassánit.
– Dat gáibida ahte geaidnojohtaleaddjit čájehit várrugas- vuođa go deivet militeara vuojániid geainnu alde. Pánservuojániiguin ii sáhte vuodjit jođánit, muhto lea hui lossat ja váttis stivret asfáltageainnu alde, lohká oberst.
Ilus
Porsáŋggu sátnejođiheaddji Aina Borch lea ilus go dál fas bohtet soalddáhat gildii.
– Bálvalusgeatnegasvuohta, befálat ja eará bargit leat bures boahtin Porsáŋgui. Mun lean ilus go dál álggahuvvojit doaimmat dohko, dat buktá midjiide olu vejolašvuođaid ja eambbo bargosajiid, dadjá Aina Borch.
Positiiva váikkuhus
Aina Borch jáhkká erenoamážit dán váikkuhit positiivvalaččat gieldda ealáhusaide.
– Dát buktá earenoamáš vejolašvuođaid ealáhusaide, ja leat maiddái positiivvalaš váikkuhusat gildii go Iŋggášguolbanii fas bohtet soalddáhat, lohká son.