Seamma buorre iskat buot beliid
Finnmárkku fylkkagielda lea ge duvle nammadan áirasiid oktasašlávdegoddái mii galgá bargat Tromssa ja Finnmárkku ovttastahttimiin. Seamma áššis mearridedje maiddái sáddet stáhtii proseassadieđáhusa, mii lea ovdagihtii dieđiheapmi ahte Finnmárkku fylkkagielda soaitá stevdnet stáda diggái. Dál čájehuvvo ahte dat lea máksán momsahága 680.037,40 ruvnno. Dat šattai máksit nu ollu, go fylkkadiggi lea bálkáhan advokáhtafitnodaga Kluge bargat dainna áššiin. Eará sániiguin, de šaddá fylkkagielda máksit álgovuorus 850 duhát ruvnno, muhto momssa jáhkkimis ožžot ruovttoluotta máksot.
Aŋkke manná dan mađe álgovuorus olggos kontos, mii dieđus mearkkaša ahte muhtun sajis šaddet unnidit goluid. Dasto čuožžila ge gažaldat, ahte máksá go dát vuosttaldeapmi eambbo go dat máistá, nu go dárogiel sátnevádjasis lávejit dadjat. Dat lea ge dehálaš digaštallan, go dán áššái lea Finnmárkku fylkkagielda golahan issoras ollu ruđaid – dušše álbmotjienasteapmi diibmá mávssii máŋga miljovnna ruvnna. Dasa lassin ii leat dihtosis man ollu politihkkarat ja hálddahus lea golahan áiggi ja ruđaid vuosttaldit ovttastahttima, nu ahte dál álgá šaddat váttis bealuštit dan stajideami.
Dat lea ge báhcán vástitkeahttá, ahte lei go Stuorradikki mearrádus oba ge lobálaš Norgga Vuođđolága mielde.
Fylkkasátnejođiheaddji Ragnhild Vassvik dadjá preassadieđáhusas, ahte dál lea dehálaš gomihit juohke geađggi, ohcan dihte buot vástádusaid ja čuvgehit ášši buoremus lági mielde. Vassvik maid ákkasta dán ášši dehálažžan Finnmárkku álbmogii čielggadit, go sii leat sihke oaiviliskkademiin ja álbmotjienastemiin čielgasit vuosttaldan bággoovttastahttima, ja dan dihte su mielas ánssášit finnmárkulaččat oažžut čielggaduvvot buot gažaldagaid. Lea ge leamaš ollu sáhka dan birra, ahte Stuorradikki eanetlogu mearrádus, ahte bákkus ovttastahttit Finnmárkku ja Tromssa, lea lobihis mearrádus.
Dat lea ge báhcán vástitkeahttá, ahte lei go Stuorradikki mearrádus oba ge lobálaš Norgga Vuođđolága mielde. Ii ge dan sáhte čielggadit eará diggevuogádagas, go dasa leat nu máŋggat oainnut láhkačehpiin. Jáhkkit dán ášši lea buoremus vuojehit gitta lohppii, vai dat lága ektui gažaldagat maiddái čielggaduvvojit. Dán áššái lea juo golahuvvon nu ollu ruhta, ahte dál ii leat veara šat bisánit ovdal buot geainnut leat iskon. Dasto lea ge oaidnit, go stáda vástida proseassadieđáhusa, ahte berre go Finnmárkku fylkkagielda loktet ášši diggái. Dan ii dieđe ovdal oaidná maid stáda vástida, nu ahte min mielas lea riekta geavahit dása ain resurssaid vaikke dat máksá, ja dađi bahábut dáidá čuohcat muhtun bálvalusaide.