Ane bassanmašiinnaid čalmmis
Lávet go guođđit lihttebassanmašiinna bassat go manat nohkkat dahje vuolggát ruovttus? Dan jearrá Trøndelága buollin- ja gádjunbálvalus iežaset Facebook-siiddus. Sii čájehit ge gova lihttebassanmašiinnas mii buollái moadde minuhta ovdal go gearggai bassamis ja go viessoeaiggát lei mannan velledit. – Juste ovdalaš go olbmás rohttejedje nahkárat, de haksigođii suovvahája. Son viehkalii geahččat ja fuomášii ahte lihttebassanmašiidna lei buollime ja son ollii de jáddadit buollima jáddadanapparáhtain.
Trøndelága buollin- ja gádjunbálvalus ávžžuha ge olbmuid álgit eambbo dihtomielalaččat jurddašit goas bidjet bassat sihke lihtiid ja biktasiid.
– Mii ávžžuhit olbmuid bassat lihtiid ja biktasiid dušše dalle go leat ruovttus ja gozuid alde.