Politiijat almmuhan namaid sis geaid jáhkket duššan

Ohcanakšuvdna heaittihuvvui bearjadaga, ja válde bottu mánnodahkii ovdal go fas áigo joatkigoahtit ohcanbarggu. Dálkki geažil eai sáhttán mánnodaga ge ohcat.

– Ferte leat áibbas sihkkar ahte sii geat mannet uđasbáikái, galget beassat fas dearvan doppe. Dan eat sáhte mii dáhkidit, ja dan dihte eat bija olbmuid bargat dan uđasbáikái, logai akšuvnnajođi- headdji John-kåre Granheim NTB:I bearjadaga.

Golbma suopmelačča ja okta ruoŧŧelaš

Politiijat duođaštit ahte ledje Mikael Sten (29), Disa Bäckström (29), Niklas Nyman (36) ja André Stenfors (32) geat dušše muohtauđđasa vuollái.

– Fuolkkit giitet gádjunbálva- lusa, dearvvašvuođabargiid, politiijaid ja dan báikkálaš heahteveahki dan erenoamáš barggu ovddas maid leat bargan ja maid ain barget. Sii giitet maid Báhcavuona suohkana buori vuostáiváldima ovddas, čállet oapmahaččat.

Geahččalit fas odne

Politiijat plánejit ohcagoahtit fas odne, jus dálki lea doarvái buorre. Dainna ohcamin áigot lokaliseret gos dat duššan olbmot leat. Dat mielddisbuktá ahte áigot dárkileappot ohcat gokko dat guovttis leaba geaid leat juo lokaliseren, ja ohcat maid dan guoktása geat maid leaba duššan.

Dálkeprognosa čájeha ahte easka gaskavahkku lea dálki dan muttos buorre ahte sáhttet fas geahččalit girdilit, ja ohcagoahtit helikopterin.