Máilmmi alimus sámenisu riikkalávdái
Máilmmi alimus sámenisu boahtá Riikkalávdái Sámi álbmotbeaivvi dán jagi.
«Stor-stina/stuora-stina lea musihkalaš teáhterbihttá alla sámenissona Stina birra.
– Nugo buot buorit muitalusat juo leat, de lea muitalus Malå nissona Christina Chatarina Larsdotter (1819-1855) áibbas duohta. Son elii dakkár áiggi go buot mii lea eksohtalaš ja veaháš eahpedábálaš bovttii olu beroštumi. Márkaniin ja sirkusiin mákse olbmot beassat geahččat amas álbmotčearddaid dahje olbmuid geain leat vigit. Su sturrodaga dihte gohčodedje «Långa Lappflickan», čállá Åarjelhsaemien Teatere preassadieđáhusas.
Teáhterbihttá lea ovttasbargu gaskal Åarjelhsaemien Teatere, Rana kulturskuvlla ja DKS Nordland.
Sámediggi ja Nordlándda fylkkasuohkan leat dorjon bihtá ruđalaččat.