Davvisámegielat oahpaheddjiid skuvlejupmi álggahuvvo Suoma beale Sámis
man vuođđun lea sámepedagogihkka ja sámekultuvra
– Lea vuosttaš geardde go dakkár earenoamáš oahpahus álggahuvvo, mas vuođđun lea sámi pedagogihkka ja báikkáláš sámi kultuvra, lohká Tomi Guttorm Oulo ámmátallaskuvllas.
Sámegielat oahpaheddjiide lea stuorra váilevašvuohta Suomas ja sámi guovlluin.
Guttorm čilge ahte earenoamážit sápmelaš oahpaheddjiide lea váilevašvuohta, geat dihtet sámi kultuvrra ja árbevieruid birra.
– Dan dihte lea ge Oulu ámmátlaš oahpaheaddjeallaskuvllas álggahuvvome ođđa fálaldat boahtte čavčča, ovttas Sámi oahpahusguovddáža ovttasbargguin, muitala Guttorm.
Vuosttaš geardde
– Mii ordnet oahpaheaddjeskuvlejumi vuosttaš geardde davvisámegillii. Sisdoalut eai leat dušše jorgalusat suomagiela oahppoplánas, muhto skuvlejumi vuođđun lea sámepedagogihkka ja báikkálaš sámekultuvra, lohká Guttorm.
Son lohká iežas smiehttan ahte ferte juoga dahkkot go váilot sámegielat oahpaheaddjit.
– Dan dihte lea ge plánejuvvon sámekultuvrra vuođul skuvlejupmi, ja dasto smiehtaimet ahte jus mii háliidit oažžut ohcciid dan ohppui, de ferte leat davvisámegillii.
Máhttovuđot ja bargohárjáneapmi
– Mii leat earenoamážit beroštuvvan árbevirolaš oahppama ja máhtu birra sámekultuvrras. Dan dihte min skuvlejupmi lea maiddái máhttovuđot ja studeantta ovdalis háhkkon máhttu váldo vuhtii, čilge Guttorm.
Son lohká ahte vuođđonjuolggadussan lea ahte ohccis galgá leat heivvolaš allaskuvladutkkus, juogo bachelor- dahje masterdutkkus muhtun suorggis, dahje unnimusat golbma jagi praktihkalaš bargovásáhus.
Gáibádussan lea maid ahte lea buorre davvisámegielat njálmmálaš ja čálalaš giellamáhttu.
– Dat mearkkaša maid nuppiin sániin dan ahte jus muhtun ii leat oahpaheaddji, muhto lea niehku oahpaheaddjin bargat, de lea dá buorre fálaldat, lohká Guttorm.
Guttorm addá ovdamearkan ahte jus áigu bargat duodjeoahpaheaddjin, de fertešii leat duodjedutkkus dahje bargovásáhus duojis. Jus ii leat allaskuvlla dutkkus ja bargá ámmátlašoahppolágádusas, de dárbbaha oahppolágádusas čielggadeami man geažil galggašii dán oahpu váldit.
Miehtá Sámi
Oahppofálaldat ii leat dušše Suoma beale studeanttaide, muitala Guttorm.
– Jurdda lea ahte go lea davvisámegillii, dat mearkkaša ahte lea sámiguovllu olbmuide, jearakeahttá lea go ovdamearkka dihte Norgga, Suoma dahje Ruoŧa beale olmmoš.
Oahpahus plánejuvvo ovttas studeanttaiguin
Ohcanáigodat lea dál, ođđajagemánus, ja Guttorm čilge ahte sis eai leat vuos nu dárkilis plánat movt ja gos oahpahus galgá čađahuvvot.
– Mii fertet vuos oaidnit oažžut go studeanttaid oba ge ja man oallugat leat. Dasto mii deaivvadit ja ovttas studeanttaiguin plánet viidáset sisdoalu.
Son muitala ahte váldojurdda lea neahttavuđot oahpahus, muhto maiddái háliidivčče deaivvademiid miehtá Sámi.
– Diehttelasat sávan ahte lea vejolaš deaivvademiid lágidit miehtá Sámi, doppe gos studeanttat leat.
Jurddaša ovttasbarggu Sámi allaskuvllain
Guttorm lohká ahte son lea jurddašan vejolažžan ovttasbargat Sámi allaskuvllain boahtteáiggis. – Mun dieđán ahte Sámi allaskuvllas álggahuvvui mannan čavčča maŋemus praktihkalaš pedagogalaš oahppu ja dien oahpu han sáhttá buohtastahttit min ođđa oahppofálaldagain. Erohus lea ahte min fálaldahkii dohkkehuvvo bargovásáhus sisabeassangáibádussan.