Guolástusdirektoráhtta HEAITTIHA guollebiebmanrusttetlobi
Grieg Seafood lea doaibman beannot jagi Vedbottenis, Davvinjárgga suohkanis. Dál lea guolástusdirektoráhtta heaittihan sin doaibmalobi.
Guolástusdirektoráhtta lea dahkan mearrádusa heaittihit Vedbottenis, ja bivdá dál Rogalándda fylkkasuohkana árvvoštallat ášši ođđasit. Rievttimielde galggašii ášši ođđasit árvvoštallojuvvot Finnmárkku fylkkasuohkanis, muhto go fylkkasuohkan ovttasbargá Grieg Seafoodain ja geavaha Vedbotn biebmanrusttega oahppobáikin joatkkaskuvlii, de čuožžila habilitehta gažaldat.
Čuvvon mearrádusaid
Grieg Seafood Finnmark gulahallanolmmoš Roger Pedersen imaštallá go direktoráhtta boahtá dákkár mearrádusain beannot jagi maŋŋel go veajehat biddjoje čáhcái biebmanrusttegis.
– Min mielas gal lea ártet go ná guhkes áiggi maŋŋel sáhttá dákkár mearrádus boahtit. Veaháš imaš ja mii goit eat leat gullan dákkár mearrádusaid birra ovdal. Ja mii han leat čađat čuvvon mearrádusaid maid mii leat ožžon, dadjá son.
Grieg Seafood vurddii njeallje vahkku, mii lea dábálaš váidalan áigi, ovdal go huksegođii biebmanrusttega. Dan njealji vahkkus eai lean boahtán makkár ge váidalusat ja de álge ge hukset.
– Dán ášši sáhttá buohtastahttit viessohuksenáššiin. Don oaččut lobi hukset, go gearggat ja fárret sisa de doalat vel sisafárren feastta. Go leat orron viesus beannot jagi, de oaččut dieđu ahte viesu gal fertet gaikut. Muhto go dan lean dadjan, go mii geahččat mearrádusa sisdoalu de mis boahtá fas doaivva beassat joatkit biebmanrusttegiin Vedbottenis, dadjá Pedersen. – Mii eat oainne makkár ge ođđa momeanttaid áššis, ja nu sávvat ge ahte Rogalándda fylkkasuohkan dahká seamma mearrádusa go Finnmárkku fylkkasuohkan álgguálggus dagai, vástida Pedersen.
Ii áiggo árvvoštallat
Grieg Seafood lea leamaš bargosadji čieža olbmui, dál ii leat šat sihkar ahte bargosadji lea bistevaš.
– Mii eat hálit árvvoštallat heaitima ja movt min čeahpes mielbargiiguin lea boahtteáigi. Mii eat hálit dagahit eahpesihkarvuođa duššiid dihte. Sii geat leat barggus Vedbottenis barget hirbmat buori barggu, dadjá Pedersen.
Son muitala ahte Grieg Seafood čuovvu iežas doaibmaplána ja ahte guolit leat dál fargga doarvái stuorrát ja ahte besset čollegoahtit.
– Min plána mielde mii čollegoahtit guliid njukčamánus ja loahpahit barggu čavčča mielde. Maŋŋel dan lea ulbmil ahte rusttet galgá leat guorus ovcci mánu ovdal go fas luoitit veajehiid dohko cuoŋománus 2020:s.
Eai vel mearridan
Juste máid Grieg Seafood bargá direktoráhtta mearrádusa vuođul eai leat vel mearridan, muhto sii leat geahččamin vejolašvuođaid.
– Mii leat ain guorahallamin mearrádusa ja nu eat leat vel mearridan máid viidásit bargat dainna. Muhto mis lea bargu álggahuvvon, muitala Pedersen.
Mielamielde boađus
Mearrasápmelaš dáiddár Ingunn Utsi lea okta gii sáddii váidaga fylkkagildii go gulai ahte Grieg Seafood lea ožžon doaibmanlobi Vedbottenis. Dál son lea ilus go váidda váldui vuhtii.
– Dán rádjái gal duođaid lei min miela mielde boađus. Sávvamis manná ge dáinna lágiin viidásit maid, dadjá Utsi ja deattuha:
– Mu mielas gal orui oalle čielga cealkámuš máid guolástusdirektoráhtta lea cealkán.
Gažaldagat mat čuožžilit direktoráhta bealis lea ahte lea go doaibma, birrasa ektui, dohkálaš ja leat go areálaberoštumit guovllus váldon vuhtii.
Eará bargosajit
Utsi čujuha ahte guovllus leat ollu eará bargosajit, go dat 7 mat Grieg Seafoodas leat, maid sáhttet manahit jus Grieg Seafood beassá joatkit doaimmain.
– Sii hállet ahte leat 7-8 bargosaji mat sáhttet loahpahuvvot, muhto mun gal balan ahte jus sii besset joatkit doaimmain de mannet ollu eambbo bargosajit. Biebmanrusttet han buktá nuoskkideami mii fas billista min vuonaid, dadjá son.
Sávvá ahte doahttalit mearrádusa
Utsi muitala hupman guolásteddjiiguin geat leat fitnan eará vuonas, Lávváris, ja sii muitalit ahte vuotna lea áibbas jámas. Dál ballá Utsi seamma dáhpáhuvvat Vedbottenis ge.
– Sávvamis dál goddet daid guliid mat doppe leat ja loahpahit biebmanrusttega. Muhto de dieđus manná muhtin jagi dassái go vuotna fas lea buhtis. Sávvamis Rogalándda fylkkagielda ge cealká seamma go guolástan direktoráhta, ahte lea beare loahpahit doaimma, dadjá son.
Guolástusdirektoráhta mearrádusas boahtá ovdan ahte sii gehččet Ilo-konvenšuvnna ja álgoálbmogiid rivttiid. Dán lea Utsi mearkkašan ja sávvá Ilo-konvenšuvnna beastit vuonaid.
– Sávvamis lea dá álgu, earenoamážit go guolástan direktoráhta nu nannosit čujuha álgoálbmogiid rievtti ja ilo konvenšuvdnii man Norga lea vuolláičállán. Dá lea vuosttaš geardde go mii oaidnit min eiseválddit čujuhit dasa ja mearrasápmelaččaid rivttiide. Jus Ilo-konvenšuvnna vuođul sáhttit beastit min vuonaid, de lea mu mielas dat buorre, dadjá son.
Billistit vuonaid
– Sávvamis lea guorus vuotna dán jagi mielde. Galggaše guođđit guovllu eai ge coggat šat merrii dieid ráhkkanusaid. Sávan ahte loahpahit buot biebmanrusttegiid mearas ja heitet billisteamen vuonaid. Bázahusat, borramuš ja dálkasat mannet vaikko man guhkás ja loahpas vel billistit Bárentsábi ge, ja movt de? Jearrala vel Utsi loahpas.