Mánáide ja nuoraide ráhkaduvvon ođđa davvisámegiel doarjja-appat
– Dát leat jurddašuvvon doarjjan mánáide ja nuoraide geain leat earret eará gullanváttisvuođat, muitala prošeaktajođiheaddji Tor Persen.
Sámi earenomášpedagogalaš doarjaga (SEAD) seniorráđđeaddi ja prošeaktajođiheaddji Tor Persen muitala ahte sihke sii ja skuvllat leat oaidnán dárbbu dákkár appaide doarjjan davvisámegielat mánáide ja nuoraide geain leat gullanváttisvuođat, geat atnet mearkagiela ja geain leat seahkálas oahppanváttisvuođat.
Doarjjan mánáide geain gullanváttisvuođat
Goappaš ođđa appat mat leat almmuhuvvon, ja maid buohkat besset nuvttá viežžat mátketelefovnnaide dahje neahttabrehttii, leat vuosttažettiin jurddašuvvon mánáide ja nuoraide geain leat gullanváttisvuođat.
Mearka-app lea sátnegirji davvisámegillii, mas leat badjel duháha mearkka. Dákkár appa gávdno dárogillii maid, muhto Mearkaappas leat čájehansánit davvisámegillii.
– Leat ollu sánit dárogielas mat eai gávdno sámegillii, ja danne lei dehálaš hutkat dákkár doarjjaappa sámegillii maiddái.
Lassin dán appas leat badjel čuođi mearkka mat ovdanbuktojit sámi njálbmedadjamiin, muitala Persen.
Persen čilge ahte Guldal Laleapp fas lea ráhkaduvvon dainna jurdagiin ahte geavaheaddji beassá dahkat geardduhemiid daddjojuvvon sániin.
– Guldal Lale sisttisdoallá njeallje bargamuščoahkkešlája ja lea vuođđuduvvon nu ahte galget dovdat eaŋkilsániid.
Sámi mearkagiellabiras lea unni
Persen čilge ahte sámi mearkagiellabiras lea hui unni ja dan sivas eai sáhte dadjat ahte lea sierra sámi mearkagiella.
– Muhto liikká leat muhtin mearkkaid oaidnán geavahusas sámi mearkageavaheddjiid gaskkas. Diet 103 sáni, mat leat almmuhuvvon dán appas, leat álgun čohkkemis ja dokumenteremis mearkkaid mat geavahuvvojit Davvi-sámi giellabirrasis.
Son muitala maid ahte sámi birrasiin, gos geavahuvvojit mearkkat, geavahit maid mearkkaid dáru mearkagiela njálbmedadjamiin.
Oahpahussii ávkin
Vaikko appat leat viežžamis buohkaide, de leat appat liikká jurddašuvvon earenoamážit oahpahusas adnojuvvot.
– Mii, SEAD, bargat mánáiguin geain leat earenoamáš dárbbut ja leat oaidnán ahte davvisámegielat mánát dárbbahit dákkár oahpponeavvu skuvllas.
Persen muitala ahte sii leat ovttasbargan, ja ain galget ovttasbargat skuvllaiguin.
– Mii leat mánáiguin ja oahpaheddjiiguin ovttasbargan dainna lágiin ahte mii leat geahččan makkár mearkasánit eai leat sámegielas.
Son muitala maid ahte sii ain ovttasbarget skuvllaiguin, go áigot dađistaga lasihit mearkasániid appaide.
Boahtteáiggi oahpponeavvut
Persen muitala ahte sii leat válljen appaid ráhkadit danne go sihke mátketelefovnnat ja neahttabreahtat leat boahtteáiggi oahpponeavvut.
– Go besset atnit dáid ođđáiggi rusttegiid, de dat movttiidahttá ja addá variašuvnna oahpaheapmái, mii lea máilmmi dehálaš jus mánát galget buori oahppama oažžut.
Son lohká maid ahte dát lea mihá hálbbit ja álo olámuttos, ovdamearkka dihte girjjiid ektui.
Ii vuos eará sámegielaide
Persen čilge ahte leat davvisámegielat skuvllat mat leat čájehan dárbbu dákkár appaide, eai ge sii leat gullan ahte ovdamearkka dihte julev- ja lullisámegielagiin leat mearkagiellageavaheaddjit.
– Mii eat leat ožžon dieđuid ahte eará sámegielain leat mearkagiellageavaheaddjit, muhto die lea diehttelasat vejolašvuohta jus čájehuvvo ahte lea dárbu.
Persen muitala vel loahpas ahte Sámediggi lea leamaš mielde appaid ráhkadeami ruhtadeamis ja ahte goappaš appat doibmet sihke IOS ja Android mátketelefovnnaide, lassin neahttabreahtaide.