Njeallje inkassoášši gártan
Min Boazu AS fitnodat Kárášjogas ii leat máksán buot rehkegiid. Logut čájehit ahte sis leat lahka miljonbeale ovddas inkassovealggit.
Logut maid Ávvir lea čohkken, čájehit ahte Min boazu AS fitnodagas lea máŋggat rehkegat maid eai leat máksán. Logut čájehit sis leat njealje sadjái vealggi, mat leat mávssekeahttá ja leat juo gártan inkassoi.
Lahka miljonbeale inkassovealgi
Eanamus inkassovealgi lea sis Trondheim Slaktehus AS:I. Dohko lea vealgi dál 406 803 ruvnnu maid Lindorff AS inkássofitnodat gáibida Min Boazu AS:S Trondheim Slaktehus AS ovddas.
Nubbi vealgi man Lindorff AS gáibida, lea vealgi mii Min Boazu AS:S Lindbak Finnmark AS:I. Dohko lea 29 104 ruvnno vealgi mii lea inkassoi sáddejuvvon. Dasa lassin lea maid 5 677 ruvdnosaš vealgi Arctic Entreprenør AS:I. Daid velggiid galgá Lindorff AS gáibidit. Njealját inkassovealgi lea 600 ruvnno Visma Software AS:I, ja Visma Collectors AS galgá dan inkassovealggi gáibidit.
2,3 miljovnna
Tronheim Slaktehus AS čuohppá gorudiid Min Boazu AS ovddas. Sii maid cáhpet ja páhkkejit bierggu. Sis lea stuorimus gáibádus Min Boazu AS:I. Inkassogáibádus lea 406 803 ruvnno.
Trondheim Slaktehus AS beaivválaš jođiheaddji, Jørgen Naess, muitala ahte go rehket ii mákso, de lea sis systema nu ahte jus ii leat mákson áigemearrái, de sáddejuvvo dat sin ekonomiijaossodagas inkassoi.
Ođđa dieđuid vuođul de ii leat dušše badjelaš 400 000 ruvnnu mii lea mávssekeahttá. Naess muitala ahte Min Boazu AS fitnodagas lea dál oktiibuot 2,3 miljovnna vealgi sidjiide. Dušše oassi das lea inkassovealgi.
– Mii leat šiehtadallan Min Boazu AS fitnodagain, ja leat ovttas ráhkadan máksinplána mas vuosttaš oassi galgá máksot boahtte vahkku. De leaš oaidnit máksojuvvo go, lohká Naess. – Naba dat inkassogáibádus, lea go dat maid dan máksinplánas? – Mii vuordit ahte sii mákset midjiide visot velggiid, ja go mii leat gulahallan dan oktavuođas, de mii maid jáhkkit ruđa boahtit máksinplána mielde, lohká son.
Bárti páhkkemiin
Naess muitala ahte sis lea buorre jáhkku ahte Min Boazu AS máksá sidjiide vealggi. Son muitala ahte Min Boazu AS fitnodat lea oastán ođđa cáhpan- ja páhkkenmašiinnaid, maid sii Tronheim Slaktehus AS:S de doaimmahit ja barget čuohppan-, cáhpan- ja páhkkenbargguid. Naess muitala ahte mašiinnat eai leat doaibman nu mo galget, ja de lea maid páhkkenbargu bisánan ja maŋŋonan oažžut biergguid rámbuvrii.
Naess lohká son ipmirda ovtta ládje go lea veahá váttis máksit sis, go mašiinnat eai doaimma nu mo galget, ja dan dihte maid jáhkká visot máksinváttisvuođaid čovdot go bierggu fas ožžot rámbuvrii.
– Mii oaidnit ahte bohccobierggus lea buorre johtu, nu guhká go beassá bierggu rámbuvrii doalvut, nu mun in jáhke dan leat bistevaš váttisvuohtan. Mii goit eat bala singuin ovttasbargat viidáseappot ain, ja jáhkkit sii mákset midjiide dan vealggi mii lea čoggon, lohká son.
– Mis lea hálddašeapmi
Min Boazu AS stivrajođiheaddji, Øistein Aagesen, muitala Ávvirii ahte sis ii leat mákkárge váttisvuohta máksimiiguin.
– Stivrra bealis mii árvvoštallat ahte lea 100 proseantta hálddašapmi ekonomiijain Min Boazu AS fitnodagas. Mieđihan ahte mis leat leamašan veahá rutiidnaváttisvuođat, muhto dat galget dál leat ordnašuvvan, lohká son.
– Ii leat makkárge ágga ovttasge ballat ahte eai sáhte midjiide vuovdit gávpečorraga, go mii máksit buohkaide dan mii sidjiide gullá. Mii maid máksit buohkaide geaidda lea vealgi, ii ge dan dárbbat oktage eahpidit, lohká son. – Dis leat njeallje vealggi, oktiibuot lahka miljonbeale ovddas, mat leat inkassogáibádusat dál. Manin dakkár dillái lehpet gártan? – Nu go dadjen, de eai leat mis leamašan doarvái buorit rutiinnat, muhto daid mii leat čorgen dál. Mii leat earret eará áigá juo máksán ollásit Trondheim Slaktehus AS:I inkassovealggi. De ii leat šat vealgi mis, in ge dieđe manin dat dieđut eai leat sihkkojuvvon. Mii máksit visot velggiid mat mis leat, dáhkida son. – Lea go vealgi ovttage boazosápmelažžii gávpečorraga ovddas? – Mus eai leat detáljadieđut dan birra, muhto stivrra bealis mii árvvoštallat ahte mis lea buorre ekonomiija, ja mii nagodit bures máksit iežamet velggiid, lohká son.
Doaibmá bures
Aagesen muitala maid ahte dál galgá biergubuvttadeapmi Trondheim Slaktehus AS bokte doaibmat bures.
– Lei álggos veahá hástalus oažžut doaibmat buvttadeami, muhto dál doaibmá mu dieđus visot nu go galgá. Mii cáhpat ja páhkket bierggu, ja galgá biergu leat rámbuvrras, lohká son vel loahpas.
Min Boazu AS beaivválaš jođiheaddji, Lasse Kvernmo, ii kommentere ášši.
Eai kommentere
Lindbak Finnmark AS rehketdoalloossodat Troandimis, geaidda lea nubbin eanemus vealgi, ii áiggo kommenteret ášši. Sii eai daja lea go 29 104 ruvdnosaš rehket mákson vai ii.
Sii čállet e-poasttas Ávvirii ahte sii eai áiggo kommenteret ášši iežaset ovttasbargoguimiid birra jus eai leat sis ožžon lobi dahkat dan, čállá ekonomiijakonsuleanta Lars Tangen.