Ballá sin ovdii dagahit go leat einnostuvvon vuoitit Melodi Grand Prix
– Sáhttá dagahit ahte olbmot eai jienas, lohká KEIINO joavkku Fred Renè Buljo. Muhto dovddus Melodi Grand Prix berošteaddji ii gal eahpit.
Maŋŋel go almmuhuvvui geat leat beassan mielde dán jagáš Melodi Grand Prixii (MGP) ja go musihkkabihtát ledje almmuhuvvon, de lei vuos Hank Voll Hell bajemusas veahtinfitnodagaid listtus. Dál leat ollu stuorra veahttinfitnodagaid áššedovdit einnostan ahte KEIINO joavkkus lea stuorámus vejolašvuohta vuoitit gilvvu.
Ilus, muhto balus
Guovdageaidnulaš Fred Renè Buljo, gii lea KEIINO joavkkus, lohká iežas oaidnán ahte sii leat veahttinfitnodagaid oiddohat. Son ii loga iežas vuordán dan gal, ja lea sihke ilus ja balus.
– Lea dieđusge somá go einnostit min leat oiddohin vuoitit Mgp-gilvvu. Muhto nu go láve sáhttit diekkár oiddot-namain, de sáhttá gártat ahte dattetge ii vuoitte dat gii ovdalgihtii guoddá oiddotnama.
MGP sáddagis lea nu ahte lea internašunála fágajury mii mearrida beali jienasteamis ja Norgga álbmot fassáhttá jienastit SMS bokte nuppi beali. Gollefinálii, seamma sáddagis, besset dalle njealjis, ja das lea dušše álbmot gii beassá jienastit. Vuoiti beassá viidáseappot Eurohpá gilvui Eurovision Song Contestii (ESC) Tel Avivii Israelii miessemánus.
Buljo lohká alddis balu ahte olbmot eai beroš jienastit sin. – Sáhttá nu ahte juohkehaš jurddaša ahte dien joavkku ii dárbbaš jienastit, dien gal jienastit juo nu oallugat. De sáhttá nu šaddat ahte eat oaččo álbmogis jienaid.
– Dákkára in leat vásihan ovdal
Nu lohká Per Sundnes Ávvirii KEIINO musihkkabihtá birra. Son ii gal eahpit ge ahte joavku vuoitá, sihke MGP ja maid ESC.
– Mii gulaimet Ann Mari Andersenis veahá luođi, nu maiddái Elin Kåvenis. Muhto dat maid Fred Renè ovdanbuktá ja obbalašvuohta šuoŋas, lea áibbas earenoamáš in ge leat vásihan dakkára ovdal, nu guhká go lean čuvvon ja bargan gilvvuin.
Sundnes muitala maid ahte KEIINO lea olahan miehtá máilmmi juo.
– Go geahččá neahtas iešguđet jienastan-siidduin, de oainnán doppe maid ahte KEIINO joavku lea oiddot. Dat sáhttá das boahtit go sin šuoŋas lea buot mii galgá ESC šuoŋas.
Sundnes lea ge dovddus sihke MGP ja ESC oktavuođas, go lea čuvvon ollu jagiid gilvvuid. Son lea maid gohčoduvvon MGPgenerálan Norggas.
Sávvá luohte gilvvu
Ruoŧa beale sápmelaš John Henrik Fjällgren galgá gilvalit Ruoŧa Melodifestivalenis lávlagiin «Norr- sken», ja son fas lea veahttinfitnodagaid oiddot Ruoŧa bealde. Fjällgren duođašta sverigesradio.se neahttasiidui ahte su lávlla ii šatta goasse luođi haga.
Jus šaddá nu ahte KEIINO joavku vuoitá Norggas ja Fjällgren vuoitá Ruoŧas, de deaivvadeaba guokte sápmelačča Esc-gilvvus Israelas ja nu maiddái šattašii luohtegilvu ESC:S.
Buljo ii loga gal ballat gilvaleames Fjällgren vuostá, baicca livččii suohtas.
– Ii mihkke livčče suohttasit go ahte guokte sápmelačča gilvaleaba luđiin vuostálaga Esc-gilvvus, ja diehttelasat sávan ahte mu joavku KEIINO ja Fjällgren deaivvadit doppe.
Báktehárjái Mgp-gilvu
Buljo lohká ahte jus sii vuitet MGP, de son meine ákkastallat garrasit ahte de galgá MGP lágiduvvot Sámis boahtte jagi.
– Jus mii vuoitit MGP, de galgá boahtte jagáš gilvu lágiduvvot Báktehárjjis, Guovdageainnus, lohká Buljo ja bohkosa.
Sundnes ii eahpit ge ahte dat lea vejolaš.
– Mii diehtit ahte jáhkuin sáhttá olahit vaikko maid ja man guhkás, nu ahte Fred Renè sávaldat lea diehttelasat vejolaš. Ja man somá livččii dat, lohká Sundnes. Muhto jus vuoitin-niehku galgá ollašuvvat, de dárbbaha Fred Renè Buljo ja su joavku KEIINO veahki olles Sámis ja Norggas.
– Mun searvvan luđiin MGP:I gudnejahttin dihte sámi árbevieru ja luođi. Lea sávvamis ahte sihke Sápmi ja Norga jienastit min gitta Israelii Esc-gilvui, lohká Buljo vel loahpas.
KEIINO joavku galgá čuojahit earret eará Álttás guovvamánu 9. beaivvi, sihke AMFI:S ja Sámi Music Awardsas. Lassin leat ožžon juo jearaldaga čuojahit ollu baikkiin Norggas ja olgoriikkas.