Sámegiella ferte šaddat doaibmi giellan digitála máilmmis
Ovttastuvvon Našuvnnnat (ON) leat mearridan ahte 2019 lea riikkaidgaskasaš álgoálbmotgielaid jahki. Dán vahkku rahppui almmolaččat ON álgoálbmotgielaid jahki Frankriikkas Parisas. Riikkaidgaskkasaš giellajahki galgá sihke čalmmustahttit ja ovddidit álgoálbmotgielaid miehtá jagi. Álgoálbmotgielaid jagi doaibmalánas namuhuvvo earret eará doarjut álgoálbmotgielaid ealáskahttima ja gáhttema ja bargat dan ala ahte álgoálbmogat ožžot oahpahusa iežaset gillii.
Nannet oahpahusfálaldagaid ja vejolašvuođaid lea eahpitkeahttá okta dain deháleamas bargguin go galgá gáhttet, seailluhit ja ovdánahttit giela. Giela ferte nannegoahtit nu árrat go vejolaš. Mánáide, geat orrot servodagain gos vierrogiella lea váldogiellan, lea dat buorit oahppofálaldagat ja giellaoahppanvejolašvuođat hui guovddáš ja mávssolaš giellaseailluheaddjit. Guhkesáigge geahčestagas das ii lea sáhka dušše daid mánáid birra geat dál ožžot sámegiel fálaldaga.
Das leat fas váikkuhusat boahtteáigái.
Oažžut sámegiela ollislaččat doaibmi digitála giellan digitála máilmmis lea okta deháleamos áššiin čoavdit go lea sáhka giela seailluheamis
Jus unnit gielaid galgá gáhttet, seailluhit ja ovdánahttit, de ferte buot surggiin servodagas bargat dainna. Stuora oassi unnigielaid álbmogiin orrot servvodagas go majoritehtagiella vuoitá. Giella mii galgá seailut ferte leat giella adno seamma árvvus go eará gielat ja dan sáhttá geavahit buot arenain servodagas. Digitála máilmmis vuoittáhallet dávjá unnitgielat nu go sámegiella. Ođđa digitála rusttegat eai doaimma sámegillii, ja dávjá dan geažil maiddái gulahallan digitála mediain manná majorihtehtagielain. Dál sáhttá juo feara makkár digitála reaidduiguin njálmmálaččat addit dieđuid ja oažžut daid bargat feara maid, muhto ii fal sámegillii.
Addá ge doaivaga go Norgga Sámediggi áigu vuoruhit giellajagi bargat giellateknologiijain ja gielaid digitaliseremiin. Dássážii lea hástalussan sámegielaide digitála máilmmis lea dat, go dain leat earálágan fonttat go stuora váldogielain, ja dat go stuora máilmmiviidosaš fitnodagat eai vuorut unnitgielaid.
Oažžut sámegiela ollislaččat doaibmi digitála giellan digitála máilmmis lea okta deháleamoš áššiin čoavdit go lea sáhka giela seailluheamis. Dat makkár sadji gielas lea servodagas lea mearrideaddji dasa makkár stáhtus gielas lea ja váikkuha maid dasa mo giella fievrreduvvo viidáseappot nuorat buolvvaide.