– Go mákso, de sihkkut mii dieđuid dalán

Lindorff AS muitala ahte sii sihkkot visot inkassodieđuid dakkaviđe go vealgi lea mákson.

Lindorff As lea mii galgá gáibidit eanas Min Boazu AS inkassovealggi. Doppe muitalit ahte go vealgi lea ollásii mákson, de sii sihkkot daid birra dieđuid dakkaviđe.

– Nu movt mii leat geargan áššiin ja leat ožžon vealggi, de mii sihkkut vealggi. Diehttelasat galgá vel mannat visot systema čađa, muhto dat dieđut sihkkojuvvojit dakkaviđe, muitala Lindorff AS gulahallanhoavda, Sverre Stenseng.

Son deattuha ahte son ii áiggo kommenteret konkrehta ášši, dušše obbalaččat.

Stenseng maid muitala ahte jus máksinplána ráhkaduvvo, de dan dihte eai gal sihko dieđuid ovdal go dainna lea geargan ja ollislaččat máksán vealggi.

Ii dárbbat máksinváttisvuohta

Stenseng maid čilge ahte jus vel ovtta fitnodagas leat ge máksinmearkkašumit dahje inkasso, de dat ii seammás mávsse dan ahte fitnodagas lea heajos ekonomiija, vaikke sáhttá dan maid leat.

– Sáhttá liikká bures dušše leat nággu ovtta gálvvu ovddas, ahte ii leat rivttes gálvu boahtán ja fitnodat dan dihte ii mávsse vuos rehkega. De lea fitnodagain nu ahte ášši manná 30 beaivvi rádjái inkassoi. Dáhpáhuvvá ahte stuora fitnodagain maid leat máksinmearkkašumit, muhto ii seammás mearkkaš dan ahte eai nagot máksit, lohká Stenseng vel loahpas.

Mis rivttes dieđut

Proff forvaltning vuovdindirektevra, Frode Solvang, muitala ahte sis leat álot rievttes dieđut ja maid maŋemus dieđut mat inkassofitnodagain ge leat.

– Dakkaviđe go vealgi mákso, de midjiide boahtá dalán diehtu, ja mii de sihkkut daid dieđuid fitnodagaid birra maid mii oažžut vealgagáibidanfitnodagain, lohká son.