Ođđa oahppofálaldat galgá buvttahit eambbo buohccedivššáriid Finnmárkui
– Buohccedivššáriid haga bisána Norga. Danne mii joatkit ain buohccedivššároahpu nannema. Ođđa fálaldat Álttás lea dehálaš oassi dás, dadjá dutkan- ja alitoahppoministtar Iselin Nybø.
Stuorradiggi juolludii diibmá ruhtadeami 100 ođđa buohccidivššároahpposadjái.
20 dáin oahpposajiin manne UIT – Norgga árktalaš universitehtii Áltái.
Mannan vuossárgga álggii vuosttaš studeantajoavku.
– Mun lean ilus go UIT čuovvola iežas servodatbarggu ja fuolaha ahte gávdno dakkár oahppu mii dárbbašuvvo guovllus. Boahtte jagi rahppo ođđa lagasbuohcciviessu Álttás. Dalle dárbbašuvvojit vel eambbo oahppan buohccedivššárat. Dál besset oahppu gazzat dáppe, dadjá Nybø preassadieđáhusas.
Ohppui háliidit jo olusat álgit. 225 ohcci gilvaledje beassat dan badjelaš 30 oahpposadjái.
– Dát čájeha sihke dan ahte dát lei váillahuvvon fálaldat, ja ahte ii dáidde šaddat váttis rekrutteret studeanttaid. Go oahppu vel čađahuvvo čoahkkanemiid bokte, de lea maid álkit heivehit bargoeallima ja bearašeallima, deattuha Nybø.
Buorit oahpahallansajit
Lassin dasa ahte dárbbašuvvojit doarvái ohccit, de fertejit maid buorit oahpahallansajit gávdnot jus ođđa buohccedivššároahppu galggaš lihkostuvvat.
Danne lea stáhtaráđđi ilus go Uit:s lea buorre gulahallan institušuvnnaiguin ja gielddaiguin, ásahan dihtii buriid ja relevánta oahpahallansajiid.
Oahpahallansajit eai leat hástalussan dušše davvin, muhto miehtá riikka.
Dearvvašvuođa- ja čálgoortnegiid ođastusat leat dagahan ahte eambbo studeanttat dárbbašit oahpahallansajiid gielddain.
– Danne leat mii várren 10 miljovnna ruvnno gielddalaš pilohtaprošektii mii galgá oččodit eambbo ja buoret oahpahallansajiid. Dát sávvamis áiggi mielde dagaha buoret rekrutterema gielddaide ja buoret kvalitehta gielddaid dearvvašvuođabálvalusain miehtá riikka, dadjá Nybø.
Buohccedivššároahppu sámegillii
Lassin dán ođđa ohppui Álttás, lea Stuorradiggi maid juolludan ruhtadeami 25 ođđa oasseáigeoahpposadjái buohccedivššároahpus, mii lea heivehuvvon sámegielat ohcciide.
UIT ja Sámi allaskuvla galget ovttasráđiid fállat dan. Sámi allaskuvla galgá fállat oahpuid sámegielas ja kulturáddejumis.
– Mis lea maid vuordámuš ahte UIT heiveha maiddái sámi oahpuid dáppe Álttás. Dát lea dehálaš gelbbolašvuohta buohccedivššáriidda, go de galget bargagoahtit dán guovllus, dadjá Nybø.