Stuorradiggeáirras beahtahallan go sámeparagráfa ii rievdaduvvo
Sosialisttalaš gurotbellodat Stuorradikkis lea behtohallan go eai olahan guokte goalmmádasa eanetlogu rievdadit doahpaga sámeparagráfas Vuođđolágas.
Mannan maŋŋebárgga meannudii Stuorradiggi Norgga evttohusa rievdadit vuođđolága paragráfa 108 doahpaga «den samiske folkegruppe» (sámi álbmotjoavku) doaban «samene som urfolk» (sámi álbmot, riikka eami álbmogin) dahje «det samiske folket» (sámi álbmot). Muhto Stuorradiggeáirasat geat ledje evttohan dán rievdadeami, eai olahan guokte goalmmádasa eanetlogu.
– Olgeš ja Ovddádusbellodat cagge sámeparagráfa rievdadeami, vaikko ii lean oktage ágga dan vuostá, lohká behtohallan Kirsti Bergstø gii lea Sosialisttalaš gurotbellodaga Finnmárkku Stuorradiggeáirras.
Čilge son ii lean vuordán eanet Ovddádusbellodagas, muhto sus ledje gal stuorát vuordámušat ahte Olgešbellodat gal háliidivčče rievdadit Norgga eamiálbmoga eamiálbmogin Vuođđolágas.
Rievdadeami vuostá
Ii lean doarvái ahte 95 Stuorradiggeáirasa dorjo evttohusa, go 71 áirasa jienastedje dan vuostá ja golbma áirasa ledje eret, go gáibiduvvo ahte guokte goalmmádasa Stuorradiggeáirasiin leat mearrádusa duohken. Ledje Ovddádusbellodaga ja Olgešbellodaga áirasat geat jienastedje evttohusa vuostá.
– Mis lea sierra paragráfa sámi álbmotjovkui ja dat lea doarvái, logai Ovddádusbellodaga Stuorradikki áirras Ulf Leirstein, sárdnestuolus.
Dát mielddisbuktá ahte Vuođđolága paragráfa 108 teaksta ii rievdaduvvo.
Sámediggi vurddii eambbo
Sámediggeráđđeaddi Eirik Larsen gii lea eanemusat dáinna áššiin bargan, lohká sii leat hirbmadit behtohallan go sámeparagráfa rievdadeami evttohus ii olahan guokte goalmmádasa eanetlogu. Muitala Sámediggi álggahii dán barggu go Norgga vuođđoláhka ávvudii 200 jagi, go dalle ođasmahttet dárogiela olu paragráfain, muhto eai paragráfa 108.
– Olgešbellodagas leamaš dássážii buorre sámepolitihkka, nu ahte mii leat dál behtohallan Olgešbellodaga mearrádussii, lohká ráđđeaddi Eirik Larsen.
Evttohit fas rievdadeami
Sámediggeráđđeaddi Eirik Larsen muitala Sámediggi bálkáhii Carsten Smith ráhkadit sierra guorahallama, ođasmahttit dán paragráfa giela go boaresáigásaš doaba, folkegruppe, (álbmotjoavku) geavahuvvo dušše Vuođđolágas, muhto ii eará almmolaš čállagiin maid eiseválddit čállet.
–Álbmotjoavku sátni lea boaresáigásaš sátni Vuođđolágas. Sápmelaččat han ii leat joavku ovtta álbmogis, muhto lea sierra álbmot ja maiddái eamiálbmot. Mii áigut ovddidit ođđa evttohusa nu jođánit go vejolaš, vai Stuorradiggi meannuda dán ášši dan maŋit válgga maŋŋá. Mii fertet bargat garraseappot dan nammii ahte stuorámus bellodagat, Bargiidbellodat ja Olgešbellodat, dorjot evttohusa, deattuha Eirik Larsen gii lea behtohallan, muhto ii vuollánan.