– Finnmárkkus lea oadjebas ássat
Politiijat čoavdan 60,9 proseantta áššiin: Finnmárkkus lea obbalaččat oadjebas ássat, ja politiijat leat čoavdán 60,9 proseantta áššiin maid leat dutkan.
Gaskavahku lágidedje Finnmárkku politiijat preassačoahkkima mas muitaledje mo diimmá jahki lea leamašan. Politiijaođastus lea nuppástuhtton ja dat lea dieđusge čuohcan politiijaid iežaset bargui Finnmárkkus. Sii leat geavahan ollu áiggi nannet politiijabálvalusa doaimma ja kvalitehta. Dál leat politiijat háhkan iežaset vásáhusaid ja ođđa organiseren lea sajáiduvvagoahtán.
Kriminalitehta ja ráŋggáštusáššit Finnmárkkus
Finnmárkku politiijain leat buorit bohtosat mat gusket áššiid čoavdimii. Buot áššit, mat leat dieđihuvvon politiijai diibmá, de čovde sii 60,9 proseantta. Riikadási lohku lea 52,2 proseantta. Finnmárkkus leat maid unnán suolaáššit main lei ekonomalaš vuoitu, veahkaválddálašvuođa áššit leat bisson sullii seamma go eará jagiid. Dutkamiin lea buorre kvalitehta ja politiijat vásihit ahte sis leat buorre ovttasbargu servodagain.
– Lea oadjebas Finnmárkkus ássat, lohká politiijainspektevra Morten Daae.
Guovdageainnus vihtta proseantta kriminalitehta
Álttás lea eanemus kriminalitehta, olles 28 proseantta áššiin leat dieđihuvvon doppe. Sámi hálddašangielddaid gaskkas leat Guovdageainnus eanemus kriminalitehtaáššit, namalassii vihtta proseantta. Unjárggas fas dušše proseantta ja Unjárga lea ge okta golmma gielddas Finnmárkkus gos lea unnán kriminalitehta. Deanus lea njeallje proseantta, Kárášjogas golbma ja Porsáŋggus guokte proseantta áššit.
– Sámi gielddain lea seamma kriminalitehta go eará gielddain Finnmárkkus. Vihtta proseantta ii leat ollu, muhto lea vihtta menddo ollu. Seammás in jáhke ahte gávdno servodat mas ii geava kriminalitehta, lohká Daae.
900 meannutkeahtes ášši
Son lohká iežas hui duđavažžan Finnmárkku politiijaguovlluin, vaikko lohká ollu buoridanmuni, de lea ollu bargu álggahuvvon. Dál leat dattetge 900 ášši mat eai leat gárvásit meannuduvvon.
– Mis lea ain ollu bargu, muhto mii leat bures boahtán johtui. Olles politiijaguovlu bargá bures ovttas, ja dainna lean hui duđavaš, lohká son.
Olusat vudjet gárrenoaivvis
Ovttain áššiin lea Morten Daae hui duđavaš, muhto seammás ii loga dieđus buorren go olbmot vudjet gárrenoaivvis.
– Lea hui heajos ovdáneapmi vuddjiid gaskkas, muhto seammás lean hui duđavaš go mii nagodit váldit sin geat vudjet gárrenoaivvis johtolagas, dadjá son. Stahtistihkka čájeha ahte lea leamašan lassáneapmi.
Ođđa kriminalitehta
Morten Daae lohká váldohástalussan joatkit dainna bargguin mainna leat álgán.
– Mii galgat nagodit geahpidit áššiid, eai galgga leat nu ollu meannutkeahtes áššit. Mii galgat maid ain addit buori politiijabálvalusa miehtá Finnmárkku. Vaikko olbmot vásihit ahte eat leat báikkis, de leat mii olles áigge muhtun láhkai báikkis. Kriminalitehta rievdá, dál geavvá ollu neahtas, nu fertet mii maid heivehit iežamet barggu ja leat sajiin gos kriminalitehta geavvá, lohká son.