Govvida dáidagiin GÁIBIDEADDJI ráđđehusa
Kárášjoga dáiddaskuvlla oahppi Inga Marie Risvik oasálasttii iežas dáidagiin Materia nammasaš dáiddačájáhusas Oslos, mas lei čájáhusrahpan ođđajagimánu 30. beaivvi.
Dáiddačájáhusa lágida Kunstskolene, mii lea dáiddaskuvllačoakkáldat masa gullet dat boarráseamos skuvllat ja dat mat barget eanemusat kvalitehta guvlui. Kunstskolene lágida dákkár oktasaš čájáhusa vuosttaš geardde.
– Ožžon hui ollu rámi iežan dáidagiin ja dat lokte iešdovddu, lohká movttegis dáiddár maŋŋil dáiddačájáhusrahpama.
Okta oahppi juohke skuvllas
Dáiddačájáhussii lea válljejuvvon okta oahppi juohke dáiddaskuvllas Kunstskolene vuolde, ovttain dahje máŋggain dáidagiin.
Sii geat leat válljejuvvon dáiddačájáhussii leat kuraterejuvvon čájáhussii olgguldas kuratoris, Kristian Skylstadas.
Kárášjoga dáiddaskuvllas ledje njeallje oahppi sádden ohcama, oktan prošeaktačilgehusain Kunstskolene čájáhussii. Daid gaskkas válljejuvvui ge Risvik. Ieš lei movttet dáinna olahemiin.
– Lei hui suohtas go mu dáidagat válljejuvvoje čájáhussii, muhto ledjen gal veahá balus ja gealdagasas ovddalgihtii, lohká Risvik maŋŋil čájáhusrahpama.
– Ráđđehus gáibida ollu návccaid
Risvikas ledje golbma čáhcemálain málejuvvon gova čájáhusas. Ovtta dain lei gohčodan «Kapitalisma», mas lea veahá politihkalaš vuolggasadji.
– Vuođđun «Kapitalisma» dáidagii lea dat go sis geat stivrejit riikka, leat eará beroštumit go mus. Dasa gusket maid sápmelaččat, luondu, boazodoallu ja gáibideaddji ráđđehus masa mannet olu návccat. Son lohká ahte nu go dáidda láve ge dávjá leat, de ferte geahčči ieš dasto dulkot viidásit ja vuđoleappo dáidaga, ja nu ii áiggo šat eambbo čilget dáidaga.
Lokte iešdovddu
Dáiddačájáhusrahpamii ledje boahtán ollu olbmot ja Risvik oaččui ollu rámi.
– Mun ožžon hui ollu rámi gehččiin ja dat lokte iešdovddu. Muitala maid ahte mun barggan juoidá riekta, lohká movttegis dáiddár.
Liiko čájehit gii son lea
Risvik muitala ahte lea hui buorre go Kárášjogas lea dáiddaskuvla ja dat attii ge sutnje vejolašvuođa bargat dan maid álo lea liikon.
– Mun lean álo liikon málet, tevdnet ja kreatiivvalaš leat. Ja dieinna vugiin beasan čájehit ja ovdanbuktit gii mun lean.
Son čilge viidáset iežas dáidagiid dainna lágiin ahte dain vuhtto sihke politihkka ja su iežas dovddut.
– Mun anán terapiijan dáiddalašbargguid, go dalle beasan iežan jurdagiid diktit golgat ja daid hábmet báhpira ala.
Mearkkaša ollu
Kárášjoga dáiddaskuvlla rektor Ann Mari Aamot lea gába ja ilus go sin skuvla ja oahppi lea beassan veahá guhkkelii dáidagiinnis.
– Dat mearkkaša hui ollu sihke munnje ja skuvlii, go mii beassat čájehit ahte mis lea dáiddaskuvla dáppe davvin ja Kárášjogas.
Son sávvá ahte olbmot bohtet mearkkašit min skuvlla ja maiddái dieđus Risvika, gii lea dál doppe iežas dáidagiiguin.
Dáiddačájáhus rahppui ođđajagimánu 30. beaivvi, Kunstplassen nammasaš báikkis Oslos ja lea rabas gitta guovvamánu 3. beaivái.