Skuvllat fertejit čuovvulit givssidandieđuid
Oahpahusdepartemeanta lea almmuhan dieđuid, ahte dađi mielde dieđihuvvojit eambbo givssidanáššit fylkkamánniide, ja njealji viđa givssidanáššis leat skuvllat rihkkon doaibmageatnegasvuođa, mii galgá sihkkarastit ohppiide oadjebas ja buori psykososiála skuvlabirrasa. Dat doaibmageatnegasvuohta bođii ge fápmui 2017 čavčča go oahpahusláhka rievdaduvvui. Skuvllat galget ge jođánit bidjat rievttes doaimmaid johtui, go soames oahppis ii leat buorre dilli skuvllas, ja ii okta ge rávis olmmoš skuvllas galgga sáhttit jorgalit sealggi ja dušše dadjat, ahte sii eai dieđe, dahje eai leat oaidnán eai ge gullan ahte oahppi givssiduvvo skuvllas. Dan rájes lea ge oahpahusláhka leamaš áibbas čielggas, ahte go skuvlii dieđihuvvo givssideapmi, de galgá skuvla dakka viđe bidjat doaimmaid johtui.
Dál čájehit ge Oahpahusdepartemeantta logut healkkehahtti dieđuid, ahte measta buot givssidan áššiin eai leat skuvllat bidjan doaimmaid johtui nu go oahpahusláhka gáibida. Dan šálloša garrasit maiddái oahpahusministtar Jan Tore Sanner. Son lea dadjan preassadieđáhusas, ahte dat lea áibbas dohkketmeahttun, go ohppiid ja váhnemiid mielas eai bargga skuvllat maide bissehan dihte givssidemiid. Sanneris lea ge čielga vuordámušat skuvllaid njunušolbmuide ahte skuvllain lea buorre skuvlabiras buot ohppiide.
Buot mánáin lea riekti oadjebas skuvllaárgabeaivái, iige oktage galggašii givssiduvvot.
Seamma vuordámušat dieđus leat muđui ge servodagas, ahte skuvllat duođalaččat atnet givssidanáššiid, go juohke okta givssideapmi lea okta beare ollu. Dát logut čájehit ahte skuvllat eai bargga doarvái bures eastadan dihte givssidemiid, go olu givssidanáššis eai leat bidjan johtui eastadandoaimmaid nu go oahpahusláhka gáibida. Dál dieđus vurdo ahte skuvllaid rektorat ja eaiggádat duođaleappot bargagohtet eastadan dihte givssidemiid, go dál lea oahpahusministtar čielgasit gohččon skuvllaid eastadit givssidemiid skuvllain.
Buot mánáin lea riekti oadjebas skuvlaárgabeaivái, iige oktage galggašii givssiduvvot. Liikká leat ain olu mánát geat beaivválaččat šaddet dán vásihit. Maiddái Sámis. Ii okta ge skuvllamánná galgga dárbbašit baluin skuvlii vázzit, go diehtá doppe son givssiduvvo ja muhtumat maiddái doaruhuvvojit. Skuvllat han leat lága bokte geatnegahttojuvvon láhčit buori ja dorvvolaš skuvlladili buot ohppiide, muhto hárdin- ja givssidanstatistihkka čájeha ahte skuvllat rahčet ollašuhttimis dán geatnegasvuođa, ja lea dárbu bidjat eanet návccaid dasa.