– Suorggatlaš jus nie boares siidaoassi galgá dušše sihkastuvvot
Dadjá Anders Nils Peder Sokki bealušteaddji, Anja Jonassen, gii lea ain optimista ahte Sokki vuoitá áššis Alimusrievttis.
Golggotmánu diibmá loahpahuvvui Anders Nils Peder Sokki guoddalanášši Hålogalándda lágamánnerievttis.
Sokki lei guoddalan Sis-finnmárkku diggegotti duomu go son ii oaččo doalahit siidaoasi Oarje-finnmárkku orohagas, 40-Orddas.
Juovlamánu diibmá celkui Hålogalándda lágamánnerievttis duopmu, ja Sokki vuoittáhalai fas stádii.
Dál doalvu Sokki ášši Alimusriektái.
– Ii leat nu go galgá
Duomus čuožžu: Sokki bealušteaddji, Anja Jonassen, oaivvilda ahte juoga lea šaddan boastut.
– Maŋŋel duođaštusárvvoštallama han mii leat ožžon duođaštuvvot ahte sus leat ja son lea ožžon konstaterejuvvot ahte sus leat rievttit Migil-siiddas. Dat lea okta dain boarráseamos siiddain Norggas, nu ahte eai leat váilevaš dokumeanttat ja dat lea maid oassin riektevuođus man ala boazodoalloláhka huksejuvvo NOU 2001:34 čađa. Hui suorggatlaš maid jus ná boares siidaoassi sihkastuvvo, čuoččuha Jonassen. Jonassen oaivvilda ahte lágamánneriekti lea spiehkastan.
– Lágalaččat gehččon de lea lágamánneriekti spiehkastan gustovaš rievtti ektui, go dat dadjá ahte sus lea suodjaluvvon riekti, muhto dat su suodjaluvvon riekti galgá gieđahallot konsešuvdnariektin. Alimusriekti han lea cealkán ahte dakkár boazodoalloriekti lea suodjaluvvon riekti ja de dat galgá suodjaluvvot. De šaddá árvvoštallan nuo ja ná, mii spiehkasta das maid Alimusriekti lea cealkán, oaivvilda son.
Mánu vuordináigi
Go lágasteaddji ja su bealušteaddji leaba mearridan guoddalit duomu Alimusriektái, de lea guhkes proseassa vuordimis.
Dál lea ráđđehusadvokáhtas 21 beaivvi guoddalanvástádusáigi. Son galgá vástidit ášši mii hálddahuslaččat lea ain lágamánnerievttis, go son lea vástidan meannuduvvo go ášši doppe. Dasto sáddejuvvo dat Alimusriektái. Dasa manná sullii mánnu.
– De galgá Alimusriekti mearridit lea go dá prinsihpalaš ášši, vai lea go ášši mas sierra beroštupmi. Dan moai diehttelas oaivvildetne, dadjá Jonassen. – Juo, dieđusge. Danne go riekti spiehkasta das maid Alimusriekti lea cealkán dan birra mo dákkár rievtti galgá suodjalit. Dat dagaha eahpečielgavuođa lágamánnerievtti duomuin. Danne lean hui optimisttalaš.
Oaččui, ja massii fas
Ášši lea oanehaččat čilgejuvvon ná:
• Sokki oaččui 1998:s siidaoasi iežas eagis. Son ii beassan váldit dan atnui, ja 2007:s son váiddii dan ášši, man Boazodoallostivra hilggui. Sokki ii bisánan dasa, ja 2013:s dohkkehii dalá Oarje-finnmárkku guovllustivra ahte Sokki oažžu eagis siidadoalu váldit atnui. Boazodoalloagronoma váiddii ášši Boazodoallostivrii, ja oaččui doarjaga.
• Sokki váiddii dan mearrádusa, ja 2015:s de mieđihii goitge Boazodoallostivra, váidaga vuođul, ahte Sokki oažžu siidaoasi. Sokkii rahppo ođđa siidaoassi. Go ođđa siidaoassi rahppo, de lea maid orohagas váidinvejolašvuohta, ja doppe boahtá váidda. Boazodoallostivra hilgu váidaga ja doalaha Sokki siidaoasi. Eanandoallodirektoráhtta bivdá Eanandoalloja biebmodepartemeantta sihkkut Boazodoallostivrra mearrádusa. Departemeanta sádde ášši Boazodoallostivrii fas, ja lohká lea áššemeannudanboasttuvuohta dahkkon, go ii sáhte addot ođđa siidaoassi jus orohagas ii leat ovttajienalašvuohta. Boazodoallostivra šadde de váldit eret siidaoasi Sokkis.
• Ođđajagemánu 2018:s doalvu Sokki ášši Sis-finnmárkku diggegoddái, go oaivvilda stáhta rihkkon su rivttiid.
• Mánu maŋŋel celko duopmu ahte Sokkis ii leat riekti dan siidaoassái. Sokki guoddala ášši lágamánneriektái, gos čuoččuha dan maid čađat lea čuoččuhan, ahte ii son leat bivdán ođđa siidaoasi, muhto rahpat fas su eagi siidaoasi man son lea ožžon.
• Juovlamánu 14. beaivvi celko duopmu ja Sokkis ii leat vel riekti dan siidaoassái.
• Ođđajagemánus dán jagi guoddala ášši Alimusriektái.