Áigumuš ásahit deaivvadanbáikki
Ođđa ásahuvvon sámesearvi háliida ásahit sámi deaivvadanbáikki Troandimii ja ovddidit sámevuođa skuvllain ja mánáidgárddiin.
Mannan vahkkus ásahuvvui ođđa sámesearvi, Tråanten dajven saemien siebrie. Searvvi galgá Kristin Sara jođihit.
– Tråante 2017 maŋŋel šattai hui čielggasin ahte dárbbašit sierra sámesearvvi mii ovddida gávpoga ja lagasbirrasa áššiid. Min áigumuššan lea ásahit sámi deaivvadanbáikki ja ovddidit sámi giela ja kultuvrra skuvllain ja mánáidgárddiin, čilge Sara ja muitala manin dát lea dehálaš:
– Jus mii galgat nákcet ealáskahttit sámegiela iežamet guovllus ja nannet iežaset sámi identitehta, de diehttelasat fertet deaivvadit ja ovttastallat, lohká son.
Ođđa organiseren
Ovdal go Troandimii ásahuvvui sierra sámesearvi, de gulle searvvi lahtut Mátta-trøndelága ja Hedemárkku sámesearvái.
– Dát searvi galggai gokčat viiddis guovllu ja danin ii lean oba heivvolaš ge dan gohčodit báikkálaš searvin. Šattai maid oalle hástaleaddjin áŋgiruššat go šattai moadde diimmu vuodjit biillain jus áiggui searvat miellahttočoahkkimiidda. Danin gávnnaheimmet ahte lea heivvolaš ásahit sierra searvvi Tråantii, mii šattai maiddái hui lunddolažžan go MáttaTrøndelága fylka lea historjá, čilge Sara.
Maŋŋel ođđa organiserema lea Mátta-trøndelága ja Hedemárkku sámesearvi maid ožžon ođđa nama. Guevteli Saemieh NSR galgá dál gokčat Plassje guovllu. Goappašat sámesearvvit gullet Norgga Sámiid Riikkasearvvi organisašuvdnii.
Sámevuohta eanet oidnosis
Troandimis lea sámi historjá ja sámevuohta bođii eanet oidnosii maŋŋel Norgga sámiid 100 jagi ávvudeami 2017:s.
– Tråantes leat sápmelaččat ja maŋŋel ávvujagi oaidnit ahte dát čalmmustahttojuvvo eanet go ovdal. Deike lea ásahuvvon sierra sámi studeantasearvi ja muhtimat organiserejit deaivvademiid gos duddjojit, lohket girjjiid ja čađahit eará kulturbargguid. Dál sávvat ahte gávnnašeimmet lanjaid gosa čohkket gávpoga sámiid ja gos beassat čalmmustahttit Tråante sámevuođa. Mii leat maiddái vuorddašeamen suohkana čielggadeami sámevuođa ektui. Dán mánus galgá ráđđealmmái muitalin man láhkai áigot čuovvulit 2017 Tråante, loahpaha Tråanten dajven saemien siebrie jođiheaddji Kristin Sara.