– SUORGGAHAHTTI go dán dillái leat boahtán
Oahpahusdirektoráhtta lea rievdadan njuolggadusaid nu ahte Romssa sámeskuvlla mánát eai oaččo šat skuvlasáhtu. Danne soitet fertet heaittihit olles skuvlla.
Tromssa sámeskuvla Áisvárguolbanis Málatvuomis lea internáhttaskuvla mas leat 21 oahppi geat bohtet máŋgga iešguđet suohkanis. Eanas mánáin lea máŋggaid millaid guhku skuvlamátki, guhkimus lea gávcci miilla ovtta guvlui. Internáhtta fállá idjadeami dušše guktii vahkus.
Skuvlabiire rájit rievdan
Dál lea Oahpahusdirektoráhtta rievdadan njuolggadusaid dulkoma das mii gullá skuvlabiirii ja skuvlasáhttui. Sámeskuvla ii gal- gga sin oainnu mielde šat leat lagasskuvla olles Tromssa fylkka ja Davvi-nordlándda guvlui. Ja go ii leat lagasskuvla, de ii leat fylkkasuohkana geatnegasvuohta ruhtadit sáhtu eambbo bearjadagaid ruoktot, ja mánnodaga fas skuvlii. Muđui vahkkus galget mánáid ruovttusuohkanat máksit sáhtu, ođđa gollu mii máksá gitta 800 000 ruvdnui suohkaniidda mat juo bággehallet seastit.
– Ii dušše skuvla
Sámeskuvlla sadjásaš rektor, Åse Merete Triumf Andersen, lohká ášši dál duođalažžan, go olles skuvla sáhttá dán geažil nohkat.
– Lea hui lossa dilli go lea eahpesihkarvuohta. Lea áitta sihke skuvlla ohppiide, váhnemiidda ja bargiide. Sámeskuvla ii leat dušše sámegiel skuvla, dat lea sámi biras gos ohppet nu go sámi duoji, boazodoalu ja biebmoárbevieruid birra. Sii ohppet kultuvrra ja giela praktihkalaš doaimmaid bokte. Gáiddusoahpahus ii attáše lahkage seamma buori fálaldaga. Lea maid muđui sámi birrasii dehálaš čoahkkananbáiki, dadjá rektor.
Boahtte čavčča livčče sis vel erenoamáš ollu oahppit álgime, birrasii 27 máná oktiibuot.
– Sáhttá dulkot
Váhnen, skuvlla stivralahttu ja NSR sámediggepolitihkkár Karen Anette Anti lohká sámeskuvlla leat hui dehálaš ásahussan sin guvlui. – Lea áibbas dohkkemeahttun ahte byrokratiija ja njealječiegat njuolggadusat sáhttet dagahit mánáid dákkár dillái. Lea definerengažaldat lagasskuvllaid birra mii lea ággan dás, muhto mun oaivvildan áššiid sáhttá árvvoštallat sierra. Dáppe gos sápmelaččat leat unnitlogus, lea dehálaš bisuhit sámeskuvlla, dadjá Anti.
Son lohká Sámediggeráđi maiddái bargat áššiin ja lea muđui duhtavaš go Málatvuomi suohkan áŋgiruššá veahkehit sin.
Bargame áššiin
Málatvuomi suohkanis dat lea Tromssa sámeskuvlla ovddasvástá- dus. Suohkanjođiheaddji Erik Myre lohká iežaset dál oččodeame máŋga čuoggá ovdan guovddáš eiseválddiide.
– Vuosttažettiin ferte sámi mánáide sihkkarastot riekti oažžut oahpu sámeskuvllas. Nubbi lea ahte ferte sihkkarastit ahte suohkanat eai dárbbat váldit skuvlasáhtu iežaset gollun. Sámeskuvlii ferte dáhkiduvvot sierra ortnet dás. Mii leat dál sádden ohcamuša direktoráhttii oažžut gaskal 1,5 ja 2 miljovnna lassidoarjjan sámeskuvlii, ja mii gulahallat maid Sámedikkiin ja oažžut sin veahkkin bargat áššiin, dadjá Myre Ávvirii.