Gávttehas ođđaseamos Kk-bláđis
Nu lohká sámi designer go gávttehas Ella Marie Haetta Isaksen oidno stuorra bláđi ovdasiiddus.
Norgga stuorámus nisson- ja bivttasbláđđi Kvinner og klaer (KK) almmuhii vuosttaš geardde bláđi mas gávttehas lea ovdasiiddus. Lassin dasa lea bláđđi čállán muhtin osiid sámegillii vel. Lea sápmelaš ja Stjernekampvuoiti Ella Marie Haetta Isaksen gii lea ovdasiiddus ja son muitala bláđđái earret eará sápmelaččaid cielaheami birra.
Áigi ahte gávttehas oidno
Sámi designer ja Abanti nammasaš fitnodateaiggát Anne Berit Anti lohká dál lei duođai áigi ahte gávttehas oidno diekkár stuorra bláđis, earenoamážit ovdasiiddus.
– Go diekkár stuorra bláđđi bidjá gávttehasa ovdasiidui, de mearkkaša dat ahte sápmelaččat ja sámi gárvvut leat álgán eambbo ja eambbo saji oažžut Norggas.
Son lohká ahte Norggas dihtet ovdamearkka dihte vieruid bunádaid birra, muhto eai dáidde diehtit gáktevieruid.
– Eai dáidde diehtit ovdamearkka dihte ahte máŋgga sajis lea vierrun molsut násteboaluide go náitala, ja die dušše unna oasáš gáktevieruin.
Livččii somá gáktemotaid čájehit
KK redaktevra Ingeborg Heldal lohká ahte sus lea álo leamaš niehku sápmelaččaid ovddidit bláđis, earenoamážit gávtti ja sámi biktasiid, dan dihte go sápmelaččat leat stuorra oassin Norggas. Ii ge son doaivvo ahte dát lei maŋemus geardde go gávttehas oidno.
– Diehttelasat in bisán dál, livččii somá ráhkadit ovdamearkka dihte gáktemotaid ja -vieruid birra ášši, ja mun lean maid gullan ahte Sámis leat čeahpes bivttahábmejeaddjit. Go Ella Marie galgen govvidit bláđđái, de lei lunddolaš ahte sus lei gákti badjelasas.
Abanti designer gal illosa go dan gullá.
– Livččii máilmmi somá jus KK ráhkadivččii sámi hábmejuvvon biktasiin ášši, dahje njuolggut vaikko dušše gáktemotaid. Mis sápmelaččain ii leat arena gos beassat čájehit iežamet gárvvuid, ja jus okta dain stuorámus motabláđiin ovddidivččii dan, de livččii mielde nanneme min sápmelaččaid ja sámi duoji.
Máilbmi jorrá ovddos guvlui
Anti lohká gal maid ahte rievtti mielde galggašii dárbbašmeahttun justt dasa bidjat fokusa go dáčča mediat čájehit gávttehasaid, muhto ii go son dat soaittáše rievdat.
– Orru dárbbašmeahttun dál, muhto ii go son máilbmi jora ovddos guvlui, ja logi jagi geahčen fas lea áibbas dábálaš ahte sápmelaš ja gávttehas lea stuorra bláđiid ovdasiiddus.
Son deattuha ahte lea rámis ja ilus go Kk-bláđis lea sápmelaš ja gávttehas ovdasiiddus.
Heldal lohká maid sávvat earáid čuovvolit.
– Mun sávan ahte eará stuorra bláđit Norggas álget maid eambbo ovddidit ja čájehit sápmelaččaid, gávttiid ja sin eallima, vai sápmelaččaid sadji ja mearkkašupmi Norggas nannejuvvošii vel eambbo.