Evttoha gielddaide VÁLDDI NAMMADIT áirasiid Fefo stivrii
Ráđđehus evttoha ahte ovttastuvvon Romssa ja Finnmárkku fylkkadiggi nammada Fefoi stivrralahtuid, muhto dasa ii leat Deanu Bargiidbellodat mielas ja evttoha ahte gielddat dat galget dan dahkat.
Dál go Finnmárkku ja Romssa fylkkat ovttastuvvojit boahtte jagi álggus, de lea ráđđehus evttohan gulaskuddamis ahte ovttastuvvon fylkkadiggi vállje áirasiid Finnmárkku Opmodahkii (Fefo) ja maiddái juohká vejolaš badjelbáza.
– Deanu Bargiidbellodaga jahkečoahkkin rávve ásahit sierra áirrasorgána, masa Finnmárkku gielddat nammadit áirasiid ja gean gaskkas sáhtašii válljet stivrralahtuid Fefoi, áirasa dárkkistanlávdegoddái ja juohkit badjelbáhcaga ja fuolahit barggu maid Finnmárkku fylkkadiggi dál bargá, čilge Deanu Bargiidbellodaga jođiheaddji Helga Pedersen.
Muitala nubbi vuohki livčče lean ahte Finnmárkku áirasat ovttastuvvon fylkkadikkis mearridit áirasiid, muhto ballet ahte dušše moadde Finnmárkku áirasa besset dan fylkkadiggái.
Ii soabat Finnmárkkulága ulbmilin
Deanu Bargiidbellodaga jođiheaddji Helga Pedersen ballá ahte Finnmárkku ássit masset váikkuhanvejolašvuođa Fefos go Finnmárkku fylka ja Romsa fylka ovttastuvvo, nu mo Finnmárkkuláhka eaktudii go Fefo ásahuvvui 2005:s.
– Dát evttohus ii soabat Finnmárkkulága ásaheami ulbmilin, ahte finnmárkulaččat galget mearridit ja hálddašit guovllu, alcceseaset buorrin. Deanu gielda hilgu ráđđehus rievdadan evttohusa. Lea guokte málle mo sáhtášii dán čoavdit, lohká Deanu Bargiidbellodaga jođiheaddji ja sátnejođiheaddji evttohas Helga Pedersen.
Finnmárkku Bargiidbellodaga jahkekonferánsa meannuda dán evttohusa áššin guovvamánu vuosttaš vahkus.
Ballet massit váikkuhanvejolašvuođa
Deanu Bargiidbellodaga jođiheaddji Pedersen deattuha ulbmil lágain ja Fefo ásahemiin lei ahte finnmárkulaččat galge ieža beassat hálddašit guovllu ja vejolaš badjelbáhcaga.
– Muhto dál lea dađibahábut ráđđehus hilgumin daid prinsihpaid go evttoha ahte ođđa fylkkadiggi, gos jáhkimis Romssa áirasat leat eanetlogus, besset mearridit gii beassá Fefoi ja mo tietnasa galgá geavahit, čilge Helga Pedersen.
Lohká jus Finnmárkkulága rievdada, de ferte dan dahkat nu mo lei ulbmil lágas. Dás lea su mielas guokte vejolašvuođa.
Fylkkaovttastuvvan ii váikkut Sámediggái
– Sámediggi lea nationála orgána, ja mii nammadat golbma áirasa geat ásset Finnmárkkus ja geat lea registrerejuvvon Álbmotregistaris ahte orrot Finnmárkkus. Sámediggi meannuda dán gulaskuddanáššin boahtte dievasčoahkkimis, čilge Sámediggeráđđelahttu Silje Muotka.
Lohká dán áššis lea vejolaš evttohit eará mii guoská Fefo stivrranammadeapmái ja Fefo badjelbáza juohkimii. Lága mielde galgá vejolaš badjelbáza boahtit finnmárkulaččaide buorrin. Dadjá lea lunddolaš ahte Sámediggi bearráigeahččá dan.
– In jáhke šaddat nu stuorra rievdadus, go dat ii leat árvaluvvon. Helga signalisere ahte sii háliidit rievdadit. Oaivvildan ahte lea dehálaš ahte mii doalahat ahte badjelbáza galgá boahtit Finnmárkku ássiide buorrin. Dát čuožžu maid Fefo strategiijadokumeanttain ja lea dehálaš maid ovddosguvlui, loahpaha sámediggestivralahttu Silje Muotka.